王兄︰
作為一個男人，要問另一個男人究竟我想點，我都覺得有d難開口，不過就麻煩你睇睇點搞好啦，唔該你啦。
我同女朋友（可以話前度架啦）一年前網上識嘅，佢三十幾歲，外貌身材都唔差，佢對外面d 人都幾有性格，串嘴嗰種，但係佢對我就真係好到我都唔知可以點形容︰
從來無發過脾氣，一句都無，黑面都無。
除咗最初識嗰陣我會見佢好密之外，其他日子我差唔多兩三個禮拜先見佢一次，一來我份工又忙，二來有時我又走去溝下女（當然唔會俾佢知），但係佢怨都無怨過，唔見嘅時間剩係喺whatsapp 度話掛著我之類。
出到嚟剩係上去我屋企「搞野」，佢都唔會話嘈生晒、阿吱阿咗，有幾次我屋企有人，要去爆房，我無錢喺身，叫佢出，佢都唔介意。
平時每日自動報行踪，但從來都無要求我要做同樣嘅事。
我乜都無買過俾佢，反而佢有送嘢俾我，直至有次我都唔係咁好意思，叫佢唔好再送嘢俾我。
我真係唔可以再挑剔佢d 乜，通街港女，我自己都閱女唔少。我認衰，我鍾意溝女，鍾意剛剛溝到上手嗰種成功感，但係唔鍾意拍拖。以前條條女，唔係頂我唔順閃走咗，就係我話飛就飛。呢條女我真係做唔出。
其實拍拖無耐佢已經有fd周到我溝女仲話咗俾佢知，嗰次我都覺得九成散梗，點知佢話只要我鍾意佢就得。老實講，係幾感動，嗰排我都收心養性咗，但係人就係咁賤，感動真係得一陣囉，過咗一輪我又身痕。
早排我屋企有事，我就的起心肝，借個勢同佢講好煩想分開。一來我都知自己唔生性，咁好嘅女仔我做乜要拖著佢；二來我又無錢。雖然佢唔係講錢嗰種女，但係唔通要佢成世跟著個男人，但又食自己用自己？三來我真係無時間。
當然講完分手，佢就梗係喊苦喊忽，又求我之類。佢話佢本來就對婚姻無打算（初初一齊佢都有講過類近嘅嘢），剩係想同鍾意嘅人一齊就夠，仲話會等我。因為好唔忍心，我就唯有同佢講順其自然，睇下遲少少心情點先再算。
再早幾日，佢以為我嫌佢煩，話以後會努力控制自己，我都再同佢講，係無乜分別、無乜用，但係當佢再話要等我嗰陣，我就答佢佢鍾意點就點啦，我真係無佢乎！
同佢相處一年，我對佢唔多唔少都有d 了解，佢係一個好堅持嘅人。其實我已經同佢講過好多次我唔值，但係佢每次都總係笑著同我講「我覺得你值咪得囉」。我個心其實係冧，所以真係做唔出扮失踪。
我知佢真係會好痛苦，由我講分手到宜家兩個月，同佢keep 著有whatsapp，佢日日一樣同我報行踪，佢身邊有乜事發生都照會同我講，一樣咁關心我，我亦一樣有覆佢。有時叫自己忍心少少，唔好覆佢，但係見佢好似好驚自己講錯嘢咁嘅時候，我又唔忍心又覆。
分咗手兩個月，我知有仔溝佢，我亦知佢拒絕咗人，我都無去溝過女。我以為自由咗，我會從回溝女嘅日子，唔知點解整整下反而比同佢拍拖嘅時候覆多咗佢whatsapp，比以前仲諗多咗佢嘅感受。
我真係覺得好煩，究竟我係咪真係鍾意咗佢？定係又俾佢感動到？連我自己都搞唔清究竟宜家同佢叫散咗未，散嘅應該無可能連一日斷聯絡都無架。嗌復合，唔係無諗過，我又驚係一時衝動，無理由到時又再講分手架。
但係近排個心又會諗，遲下如果佢真係放棄咗我，或者跟咗第條仔，咁唔知會點。 我又驚到時自己會後悔，成世仔真係老豆老母都無佢咁關心我，有時都會諗其實係咪只係我自私。
總之我宜家連自己係咪叫鍾意佢都唔知啦，不如你俾d 高見我。
CP
CP：
開口問另一個男人感情煩惱也許尷尬，但不問，很可能就會繼續自以為是錯下去。
只有男人才明白男人本能那種無法專一的矛盾。明知這女人很好，但就是不甘心只跟眼前這個人一起，就算知道錯過了這個女人今後再也不可能遇到個更好的，還是無法好好管束自己的下半身，上半身與下半身永遠對立分裂，朋友，我明白。我真的明白。
或許這樣說吧，你今年多大了？如果你已經超過三十歲，一個男人，過了這年紀，即使要媾女，也不可能像o靚仔般只靠外表了。你沒有事業，沒有理想，沒有追求，錢又沒有多少，今後還能呃多少條女？你還有飯開的日子完全有數得計，你也不想最後一無所有，淪為蘭桂坊凌晨執死雞抬屍的那些癟三的吧？
男人是一輩子跟自己下半身戰鬥的孤獨。如果你真的想長大，想成熟，成為一個男人，你就得懂得為將來打算。老實說，你什麼都沒有，行為跟賤男沒分別，也還有一個外表性格身材都不錯的女生如此對你包容犧牲，你還想怎樣？
除非，你只滿足於量多於質，只要女多，質素如何沒所謂，那你就可以繼續做隻無腳雀仔四處媾女，否則，我真的不認為你錯過了這個好女生後還能找到個比她更好的。
事實擺在眼前，選擇怎樣的路，也會通往截然不同的人生。不要以為有女人會等你一世，就算有，如果你還有一點惻隱之心，如果你還是個男人，你也不該要一個好女生為你如此犧牲。對你賤的女人你死心塌地，對你好的你盡情欺負，你還算是男人嗎？
撒泡尿照照鏡子，想清楚，你，究竟想做一個怎樣的男人。究竟是自以為是的累人累物的所謂天煞孤星，還是，痛改前非，成為有能力給予身邊女人幸福的男人。
祝 be a man
貽興
