當婉婷接聽 Vincent 電話時，她幾乎想放棄思考，直接衝進酒吧問個明白。可是，她還是沒有那種膽量。
「喂？老婆？」Vincent見婉婷沒有回應，再次催促。
「嗯。我仲行緊街呀！你呢？」婉婷反問。
「仲同個客食緊飯，晏少少返。」
「唔好太夜。」
兩人掛線後，婉婷立即鬆了一口氣，好像怕被人發現自己做了錯事般。但明明她就是懷疑 Vincent 有所隱瞞才跟蹤他的，怎麼自己像是欠了他一樣呢？
婉婷繼續在不遠處等 Vincent 出來，猜測着兩個可能性：他獨個兒走出來，還是他跟耀達一同走出來。要是前者的話，或許 Vincent 只是平日的生活壓力過大，而自己後知後覺，所以他才會偷偷自斟自酌。要是後者的話，或許……她想了很久，也想不出個「或許」來。
一小時後，結果出現了。Vincent 獨自走出酒吧。
正當婉婷暗駡自己幻想力太大之際，Vincent 卻突然回頭，那道可恨的酒吧門再次打開。耀達也步出酒吧，而且還跟 Vincent 談了幾句。Vincent 看似嚴肅地叮囑，而耀達卻一臉不爽。雖然明顯地兩人的關係不太好，甚至有點敵意。可是，這已足夠證明兩人是認識的事實。
婉婷呆呆地看着比任何驚悚片更叫她冷汗直冒的畫面，身體卻僵硬了。
直到兩個男人分道揚鑣時，好奇心驅使她必須跟上其中一人。在「一起做壞事的更可信」的原則下，婉婷決定跟上曾跟她半幽會過的耀達。
過了好幾個街口後，耀達站在電單車前。婉婷心裡開始慌張起來，要放棄跟蹤，還是直接上前呢？因為即使她馬上截一輛的士，也未必可跟上對方。可是，問題很快解決了。
婉婷的電話突然響起，而來電顯示卻是那個不再神秘的陌生號碼。
「喂？」婉婷接聽了。
「妳想坐我車尾，定截的士繼續跟呀？」耀達以免提聽筒說話。
原來耀達早已發現婉婷跟蹤自己，於是婉婷只好掛線，現身上前。
「上車。」
「去邊呀？」
「妳跟咁耐，都係想知咩事啫。」
「有咩唔可以而家講？」
「聽唔聽，隨便妳，想知就上車。」
婉婷再次坐在耀達電單車的後座。可是，這一次什麼浪漫氣氛也煙消雲散。直到再次置身於那間充滿工業風的房間內，婉婷仍是不發一言。
「冇嘢問我咩？」耀達為婉婷送上一杯咖啡。
「唔知點問。」婉婷不是晦氣，而是真的摸不着頭腦。
「由最簡單開始問啦！」
「你識我老公？」
「好明顯。」
「幾時識？」
「未夠一年。」
「點解要識佢？你到底想點呀？係唔係我 hurt 得你太犀利，所以而家嚟報復？」
「妳一係唔問，一問就幾個問題。」
「唔好岔開話題，你答我先啦！」
「唔係我去識妳老公，係妳老公主動搵我。」
「點解會咁？」
「我唔可以答妳真正原因，我只想講佢係為妳好。」
「我唔明白。」
「妳唔需要明白。不過，多啲信任佢。」
「你就係想同我講呢啲？」
「係。」耀達想了一想後，續說：「另外，我哋喺銅鑼灣相遇，唔係刻意。」
「係冇刻意出現喺銅鑼灣，定係冇刻意出現喺我面前呀？」
「冇分別啫。」
婉婷實在不滿耀達的所謂解釋，知道了一點後，卻產生更多謎團。
「講番之前個問題。你既然識 Vincent，又之前同我……好似有啲嘢咁，算咩意思呀？」雖然有點口窒，但婉婷的態度卻是毫不留情。
「妳都識講啦！只係『好似有啲嘢』，但結果咩都冇發生過，係唔係？」耀達倒是答得輕鬆。
「因為我當年同你分開咗，所以你而家想破壞我？」
「妳都幾固執㗎喎！」耀達眉頭稍稍緊鎖了幾秒後，立即轉而無奈地說：「妳覺得我點解上次唔繼續引誘你呢？」
「你根本一心想玩我囉！」
「如果係咁，我唔會停手。做埋之後，我有我爽完，妳有妳繼續驚同後悔。」耀達定眼望了婉婷一眼後，別過頭笑說：「妳唔好以為我唔想。我到而家仍然有妳最可愛、青春、性感、任性……之類的種種回憶。每次見妳，妳都好似仲停留喺最吸引我嘅時間。其實，我已經用晒所有定力先㩒得住自己。」
「唔係因為我 hurt 過你，所以……」
「如果講 hurt，我諗我要向妳講一世對唔住都唔夠。如果我仲算係一個好人的話，妳就係我嘅良心同底線，因為我唔想再對人唔住。」
「既然係咁，你同 Vincent 有咩同點解瞞住我呀？」
「我諗我嘅身份唔適合再講落去。不過，我都係果句：為妳好！」
「你咁樣講反而證明有啲關於我嘢，我竟然係最後一個知。而且，你同佢仲神秘到要用一個冇人知嘅電話號碼聯絡。」
「電話號碼？」耀達聽完後，恍然大悟地大笑起來：「果個只係私人電話號碼，唔係秘密嚟。我同妳見番果時，因為我俾咗公司卡片妳，所以妳 record 果個係我工作電話。」
「但係你每次同我見完，都會向佢講，係唔係？」
「係。」
「你哋係唔係變態㗎？」
「如果係的話，妳就要檢討下點解唔同時期愛上妳嘅男人，都竟然係變態啦！」
耀達那份笑容，讓婉婷知道無論她再怎麼糾纏下去，也不會再問出什麼來。於是，她決定離開。雖然疑惑好像比之前更多，但總算安心了不少，畢竟耀達並沒有說謊或砌詞狡辯什麼，足以說明兩個男人之間的「秘密」，並沒有如狗血的推理劇情般對她不利。
「我啱啱搵過你呢件事，你會唔會同Vincent講？」臨行前，婉婷問。
「理論上會。但係如果妳想親口同佢傾，我可以唔講住。」耀達微笑着回應。
「多謝！」
（待續）
下一集：《兩個天堂》（十六）
從頭睇：《兩個天堂》（一）
重溫：
柏原太賀facebook：
