短短一星期內發生連續兩單離奇屍體發現案，一單短劍插心的以自殺作結，另一單連心臟也沒有的，也只被視作意外。如此匪夷所思的恐怖事件，竟沒有嚇怕一般市民，反而人人也化身偵探，對兩名死者起底，在網絡上鬧得熱哄哄。
「老闆，其實你驚唔驚呀？」Linda 在 lunch 時問 Herman。「你上次見完個男人之後，佢變咗浮屍喎。」
「咁我要驚咩呀？」Herman 在公司叫外賣時，其私人辦公室的唯一員工總會一起吃的。
「而家啲人話可能係咒詛嚟，會傳畀接觸過嘅人呀！」
「咁誇張？」
「誇張唔過死咗個男人啦！冇人知，連未婚妻都唔知佢死前果晚去過邊呀！仲有呀，之前刀插心口個女人都係一樣呀！」
「妳八掛到連人哋有未婚妻都知？」
「咩喎！」Linda 在 Herman 面前，不時會流露出小女生的嬌嗔。「我邊有八掛喎！網上係咁傳，一上網就睇到啦！」
「咁妳仲發現咗咩呀？」
「有呀！有呀！有人話呢……呢兩個人雖然完全冇交集，但可能都係秘密加入咗某個邪教，成為活祭品。」
「邪教都諗到？」Herman 不禁一笑。「小心諗壞腦呀！食完就開工啦！」
Linda 突然嘆氣一聲。
「老闆，我邊有咁多嘢做呢？你請我返嚟，都係想我做花瓶啫。」
「係喎！都唔記得咗妳個腦冇用好耐添，咁妳算幾稱職。哈哈！」
Linda 向 Herman 做了一個鬼臉。這種神經大條，沒大沒小的性格，正正是 Herman 放心的原因。
******
「你咪再諗啦！壞腦㗎！」
在重案組辦公室內，經驗豐富卻因某些原因不能再升職的白 Sir，發現年輕的許 Sir 正對着一大堆資料苦思，不禁作出勸導。
「呢兩單案，明明大纜都扯唔埋，但偏偏我直覺就話我知，佢哋之間係有關連。」
「證據呢？」
「冇。但係調查唔係應該大膽假設咩？」
「係。不過，所謂假設係要建基於某啲線索。你呢種同啲揭秘 YouTuber 一樣欠缺證據嘅直覺，唔係假設，而係靠估。」白 Sir 嘆氣了一聲後，再說：「而且，呢兩單案已經 close file，你就唔好冇嘢搵嘢嚟做啦！」
「就係咁樣 close 咗，我條氣先唔順。法醫講明個女死者喺在生嘅時候，用劍刺穿心臟嘅。心臟喎！個女人只係普通人，都唔好講佢竟然擁有武士一樣嘅忍痛能力，淨係一劍前入後出都避開晒胸骨就已經唔容易啦！」
「避開胸骨，唔係完全冇可能。我哋亦冇辦法排除個女仔持劍嘅時候，撞向例如牆之類嘅硬物，一劍穿心。佢被發現時雙手持劍，只係死前本能掙扎想抽番把劍出嚟。」
「不過，佢死後嘅網上流出嘅短訊紀錄就更怪。一個預備自殺嘅女仔，點可能前一刻仲打算去接生意？而且，佢無論感情狀況同金錢上，都冇做援交嘅理由。」
「你同啲援交女好熟咩？」
「咁又唔係……不過……讀大學嘅時候，總會知道邊幾個女同學做呢味嘢。」
一剎那的眼神飄忽，又豈會逃得過經驗老到的白 Sir 呢？只是既然明知這個血氣方剛的小伙子單身，有些事情便不好說穿。
「你冇幫襯就得啦！咁個男嘅呢？」
「個男嘅喺海度兩日，的確排除唔到因為水流撞石而割開胸部，再畀啲魚食咗個心。但係佢個肺仲喺度喎，而且身體其他地方都冇明顯割傷喎。一具浮屍識得用個胸對住石撞埋去，呢個可能性好低啫！」
「好彩都叫有啲分析，我幾驚你話佢哋中咗撞邪咒詛呀！」
「咁阿 Sir 你都同意我繼續查落去？」
「唔係喎。」白 Sir 決定作出身為上級的指令：「既然已經 close file，我哋就唔應該花時間再查。你要記住，我哋係打份工，唔係做神探，understand？」
許 Sir 無奈地答應。他曾親眼見證過這位上級的辦案能力，即使嫌疑犯裝神弄鬼，甚至整容變成另一個人，他都能憑丁點的蛛絲馬跡，把案情的前因後果一一洞悉。前陣子，他倆更協助打跨了一個從殖民地時代，便已植根於香港的黑幫社團。
可是，正正在那件事後，白 Sir 好像一下子老了，更失去了往日的衝勁。有同僚以為白 Sir 不高興的原因，是功勞被另一部門搶走；也有人以為這位不惜開罪所有上級也要破案的老前線，不滿講究定罪效率的新風氣。總之，白 Sir 連慶功也沒有出席，只留下一句：「呢啲我哋本份，以後只要做本份就夠。」
如今，這位屢破奇案的傳奇，正背着仰慕自己的後輩，孤獨地回到房內。
誰都以為他預備咬糧，卻誰也不知道他的抽屜內，有一大疊關於兩單已 close file 的案件資料。
「係咒詛嗎？」
******
「咯咯！」
晚上，白 Sir 來到一個住宅單位，在叩門了好一陣子後，屋內才有動靜。打開門的，是一個失魂落魄的男人。
「警察。」白 Sir 向男人展示證件後，竟立即說：「陳志偉，你老婆死果晚，有冇人可以證明你去咗邊？」
「阿 Sir，你咩意思？」男人有氣無力地問。
「我懷疑你老婆唔係自殺……」白 Sir 死盯盯地望着男人的雙眼，逐個字清楚地說：「人，係你殺嘅。」
（待續）
重溫：
上一集 >> 【Let's Play (3) 浮沉】
從頭睇 >> Let's Play(1)逆援交
柏原太賀 facebook：
