朋友灰爆，因為新年，又要見班咁嘅親戚。
介紹返，親戚，是一班有少少血緣，但到有絕症時連捐滴血身體都會排斥的DNA外人。朋友好灰，因為她的親戚總喜歡在見面時問長問短。
有拖拍未呀？幾時結婚呀？你都唔差丫，要求咪咁高啦！
你份工點啫？搵幾錢呀？買樓未？
考到邊間大學？我個仔入科大，你呢？
無見一年胖了，準備生仔嗎？幾時生呀？
「大佬，我月頭才過完鬼佬新年，剛剛先叫做回到氣無再後悔上年太廢，現在又嚟多鑊！」朋友扭哂計。
由於我沒有親戚，對過新年不太有經驗，所以我只能從一般禮儀入手去安慰︰「在社交禮儀上，大庭廣眾問人私事，是很無禮的，你應該認真地阻止他們。」
「香港家庭是這樣的，你阻止，會反被說無禮。上次有個阿嬸大大聲問我幾時生仔，我都不能黑面。」未嫁的朋友解釋。
「是嗎？既然有這個social norm，再有人問你幾時生仔，你就問她幾時收經囉，禮尚往來，互相關心一下子宮幸福。」
「哈哈，當然不可以啦！長輩可以問你，但你不可以問他們。」朋友再解釋。
「反抗呢？惡返轉頭得嗎？我不會在長輩喪禮問『幾時到你』，你都別在表妹婚禮問幾時到我。」
「你這樣說，會死得好慘，班親戚肯定鬧爆你。」
「即是說，他們可以無禮，不容許雙向查問，你不能反抗，這根本是强權。」
「你這樣講好奇怪……」
「奇怪的是你，又要讓人吠，自己不肯戴頭盔。」
「新年應該開開心心的⋯⋯」
「那你陪笑囉，反正有利是收，當做兼職。」
朋友嘆了口氣，繼續灰。而我，則繼續一頭外星生物似的，百思不得其解地看着她。
有些事，既然解決不了，煩來幹嗎？反正每年才見一次，就當參加了海洋公園動物怪叫團囉，聽講區議員經常搞的︰免費入場，包晚餐，有車馬費，仲有橙送。想深一層，其實幾抵。
周靈山，愛情及瘦身食譜作家，著作包括《你是女皇，他就是皇帝！》
個人網站︰https://lively.com.hk/
Facebook：https://www.facebook.com/lively.com.hk/
Instagram︰lively.com.hk
