深雪︰
你好！我經常看你解答別人的愛情難題，喜歡你獨到的見解及現代女性的思維。其實我的疑難已經困擾我一段時間，我真的很需要一個專家給我點意見，因為這關乎我終身幸福。
以下我不會用書面語，比較能真實表達我的感覺。
我介紹下人物先︰
阿A 係我一齊4年多嘅男朋友，3X 歲， 性格內外寡言（即係好悶）、冇主見、有錢 、專一（呢5 年冇任何其他女仔）、錫我。
佢份（人）好悶，唔會諗下同我去邊拍拖咁，而且又唔識氹我（比我驚喜嗰D）。
但其實佢叫做對我好好，我一有少少唔舒服就陪我睇醫生，我有時執下屋佢又怕我辛苦叫我唔好做叫工人做，行街買嘢一定係佢比，仲成日話買珠寶手飾名牌袋比我。不過我都話唔洗買，因為其實我哋平時洗費都好大，成日去食貴嘢。
我同阿A 嘅關係，我都唔識形容。佢好信任我，我係了解佢而佢又會講內心想法比我知。
我唔知自己仲愛唔愛佢，有嘅都係感情多過愛情。
不過一齊咗佢都好專一，佢係好一心一意嗰D人，因為佢怕麻煩又唔想攪咁多嘢，所以習慣咗就我囉。對我都幾好啦，冇乜惡習，其實佢真係幾好架啦，係衰咗個人悶同冇主見。
但我阿媽就成日講，搵老公搵個咁先好，悶即係冇好多嗜好，多D 時間比到屋企，多D 錢比你；冇主見即係比你話事，好過大男人要你聽晒佢講。我諗諗下都（覺得）有D道理。
佢係唔叻，但叻嘅男人好多都花心，佢唔識講嘢，但專一。所以我好明白呢個世界上冇人係完美，佢嘅優點亦即係佢嘅缺點，差在你自己想要D 乜。
到而家，我知道我同佢剩低嘅係感情，但呢個係一個我好熟悉嘅人，同佢一齊我好有安全感。
另外一個就係阿B︰
阿B，今年2x 歲，月薪4 萬。有D大男人、叻仔、有事業成就、好識氹我、有驚喜、有主見，基本上係同阿A 相反！
阿B係我鍾意嗰種類型，同佢果種相處模式都係我enjoy既，我同佢一齊好有愛情嘅感覺（熱戀嘛），不過唔知keep到幾耐，因為我地見面時間少，會成日有掛住嗰種感覺。
我地成日都好sweet，呢種就係我同阿A 冇架。同佢一齊，佢係好識照顧你嗰種，佢好識解決問題，總之同佢一齊嘅感覺就係萬大事有佢我就唔洗擔心。
我覺得自己都真係好鍾意佢，我會為佢做好多未做過既事。
我覺得佢條件係幾好，年青有為，大好前途，個樣OK 啦，識打扮，講嘢有point，有思想，仲想點？
佢除咗錫我都對我身邊嘅人好好。搵到個咁嘅男朋友，講真我真係覺得自己好幸福，如嗰從來冇阿A，我知我根本乜都唔洗諗。我同佢都有傾過下結婚既事。
其實我知佢對我真係好好，佢係衰咗脾氣差D ，不過而家都改咗好多。
我真係好苦惱，我都知自己好貪心。同阿A 分開嗰陣，我真係覺得錢唔重要，我唔係要搵個好有錢嘅男人，照顧到我就夠了。但而家先體會到，原來錢都係好緊要。但阿A，我只係答一句我願意，我就可以做少奶奶生活無憂。
同阿B 結婚，唔會憂柴憂米，應該有小康之家，但唔係以前嗰種。而且佢仲要儲幾年錢，如果呢幾年有咩變動咁我點算？
好多人咁辛苦都係想嫁個有錢人唔洗做，我屋企人成日話我傻。同屋企人講佢地實幫阿A，因為佢地係既得利益者。
而我同阿B，就係世界上最平凡最簡單嘅一般人嘅愛情故事，呢種關係係最幸福。同阿B一齊我好開心，同阿A 一齊，嗰種開心又唔係呢種開心。但我又考慮到愛情幾甜蜜最終都會變做感情。
當然，我哋都知道呢個世界係好現實，有情係唔可以飲水飽，淨係鍾意係唔夠，而家唔係講緊簡（揀）男朋友，係簡（揀）個老公。我要點改變我嘅心態同思維先唔會再比呢個問題困擾？ 深雪，美麗又聰明嘅你會點選擇？
想結婚生BB 嘅我
想結婚生BB嘅你︰
阿 A 和阿 B 是兩個 package 。
阿 A 的 package 好方便，只要你嫁給他，就做闊太，拉頭馬，他的家人又好疼你。
但是，你和阿 A ，兩人之間已無 passion，真是少少都無 。
阿 A 無去滾，但是，阿 A 又不見得好愛你，他的問題是，他對自己、對生活，都無 passion，對你亦然。
阿 A 的狀態，有點植物人 feel 。
如今，你已和阿 B 一起，你走回頭去阿 A 那裡，阿 A 還會肯要你嗎？
有些女人嫁給阿 A 會很 OK ，就是那些對愛情完全無需求的人，她們不要愛情，她們只要麵包。
但你想要愛情的，於是，你才會與阿 B 一起。
阿 B 給你愛情，對你也好，只是，他未發達。
你忍不忍？你肯忍，他可能五年後就發達，那麼，到時候，你一樣是個闊太。
阿 B 很好呀！他叻仔、處事成熟、與你相愛。實在是個好對象。
如果我是你，我都會想揀阿 A 然後又想揀阿 B 。起初我會覺得揀阿 A夠穩陣，但後來我就想，如果阿 A 在拍拖時已經不太愛你、無 passion，他婚後只會更加一池死水、完全變成植物人。
那麼，搏一舖，揀阿 B 吧！你們相愛，他又對生活和你有 passion，這種 passion ，能抵抗未發達的遺憾。說到底，搏一舖，這個阿 B ，將來似會發達的，就算不是發大達，以他的本事，都能令你衣食無憂。
如果，你是那種喜歡物質多過愛情的女人，揀阿 A 真是再對不過。但你自己知道，你真的不是。
深雪
