深雪姐姐︰
你好，我是一個男生，知道你是愛情小說作家，我自問對女性不太了解，故希望妳能夠給予我一點寶貴意見。
一年半前我在公司認識了一個女仔A，佢曾經主動追我(沒有表白)，雖然也對佢有好感，後來因為當時我有女朋友我拒絕了，自此大家甚少講嘢。
後來，7 月1 號和女友分手了，其實早就已經不再愛女友，所以我很快便放下，決定要追返A，返嚟。由於佢做到今個月尾就完，所以我想把握時間，不想後悔。
正因如此，我太急了，7 月2 號第一次whatapp 傾偈想約佢出街被拒絕了，其實不算拒絕，佢有講個，帶多個女同事，但我聽到咁所以說算數。
後來我主動關心佢，對佢溫柔體貼，佢叫我唔好浪費時間喺佢身上，話佢唔啱我，俾唔到幸福我，我最初以為佢試我，後來佢是認真的。
佢更講，如果我追佢，佢會好驚，唔知同我講咩好。
之後呢段日子佢有時會主動打俾我，我都有時候打俾佢。大約一星期講1、2次電話，我放假有時佢都會問我去邊度玩，但之後佢又主動講叫我唔使對佢咁好，同我冇可能，做朋友咪幾好，我於是追問佢，佢都係說佢唔啱我，我就話，依家先係追你10幾日，咁快呃殺我機會？為什麼不用心去感受我是認真？佢仍然叫我唔好對佢咁好。今次算係第2次被拒絕。
但大家好快又變返平時咁有講有笑，都係有時打俾大家。之後有一晚佢打嚟傾偈，佢又講唔好對佢咁好，今次我決定要深情說一次︰「不是要你現在決定，即使你拒絕我多少次我都會站起來繼續追，因為我是真的喜歡你，我會等你接受我為止，我不想再錯過機會，我明白你之前拍拖受過傷，但你前度做得不好的，不代表我不能給你幸福，這根本不公平！我知道我是太急，所以我想你用日子慢慢感受我的誠意，不要再用朋友壓我了。
沒錯，我是一個要面子的人，但在你面前，我已沒有所謂。以前我追女仔的時候被拒絕一次就會放棄，但對住你我不會，因為我很喜歡你！之前是我做錯了，我明白自己要付出雙倍代價你先會接受我，我冇所謂的。你知道嗎？
人人說你性格像男仔，但在我眼中就是一個好女仔，一個美麗的女仔，不是單指外表，主要是內心。你的內在美，很善良、很溫柔，我是深深感受到的。」
此時，我聽到佢有少少哭聲，我唔知有冇聽錯。佢之後就用膚顯（敷衍）態度說會考慮。
到第二日返到公司大家都好拘謹，甚少講嘢。之後再到第二日，我決定約佢出街，佢一口拒絕，此時，我的心真的碎了。
要說都說了，或許真的放棄，之後我決定不再跟佢講嘢，不想再見到佢。
點知就當我當日無視佢之後，佢夜晚打俾我，我唔聽，佢打咗6 次嚟，說佢病了。原本想我幫佢睇下有冇醫生睇，又問我係唔係好憎佢，打咁多次都唔聽電話。之後佢仲約返我出街睇戲，結果幾日後我地第一次出街了。
出街過程大致順利，當日落大雨，佢竟然冇帶遮，結果我遮佢。其實我明白是她制（製）造機會，睇戲時我帶多咗件杉俾佢，又主動體貼佢。
時至今日係追佢第26 日了，我想問深雪姐姐，我應該怎樣做才能令她相信我，肯慢慢接受我呢？謝謝！
kiros
kiros︰
你們已經在發展當中啦。
你有意，她又欲拒還迎，幾好呀。
我的建議是，relax 些，喜歡的話，開開心心約會，大家識做、有誠意，就好。
你都拍過拖，你知道，男女間的事，可以好複雜，就算真的互相喜歡，一樣可以搞到好複雜。
於是，你最好有耐性，對她先作出遷就，以她的角度出發。
何謂追女仔？這就是追女仔，重點是，以她為先。
追到之後，你才由下把位慢慢走上來。
但歸根究底，男女關係要成功，還得看緣份。
就算大家相處得好、又互相欣賞、有誠意發展，最後，還要看緣份。
暫時來說，你肯追，她又給你機會，似乎傾向樂觀。
我想你知道的是，女人揀男人，需要乎合以下幾項：1. 條件對；2. 有 feel ；3. 對她好。
你覺得，你能乎合這三個項目嗎？
最後，我想說，要是你和她不能成事，要是她又有藉口推開你，不要遷怒於她。人，是有權選擇的。
深雪
