圖片來源：TVB
「恭喜晒！」一班朋友响酒吧齊聲向Simon 祝賀。
「多謝！多謝！」Simon 向每一位兄弟笑上一個見牙唔見眼嘅笑容。
佢啱啱宣佈同拍拖三年嘅女友---阿Wing 結婚。
酒過三巡之後，大家嘅說話開始放肆起嚟。
「Simon，我真係服咗你，阿Wing 出名係港女，你咁都肯娶佢？」朋友A 問。
「係囉！之前Eric 都追過佢，就係頂唔順先走頭，你到底有咩方法先？」朋友B 亦問。
「喂！九千年前嘅嘢，就唔好攞返出嚟講啦！」Eric 為免尷尬，立即叫停，似乎佢仲好清醒。
「唔緊要！大家咁諗都好正常。」主人家反而落落大方咁講：「其實，我拍拖頭一年，我都頂阿Wing 唔順，仲嘈到差少少分手。不過……大家兄弟，我信你地先講……」
眾人立即安靜起嚟，一心靜候Simon 嘅偉論或必殺技。點知佢講咗一個令大家O晒咀嘅原因……
「我偷睇過佢嘅msn……
**********
當日，我又因為阿Wing 要買衫而嘈交。
「其實妳已經有好多衫啦！做咩仲買呢？而且，今日廿幾號，我仲未出糧……」
「你唔好咁煩啦！我想買咪買囉！你無錢，我比囉，咁得未！」
「我唔係咁意思。」
「咁係咩意思呀？」
有時，我真係唔明啲女人，攞咗個彩就算啦！仲要攞到盡！
「買！我買！」
每逢星期五晚，阿Wing 都會去我屋企過夜。不過，一肚氣加上二千蚊嘅衫錢，令到當晚完全無晒mood。
「都唔知你幾時先肯搬，間屋細到連放多部電腦都唔得！真係逼到轉身都無位，唉！我去沖涼先。」
「頂！我住咗呢度成十年，又唔見我直出直入！」我忍唔住好輕聲咁係自言自語。
「你講咩話？」
「無。我無講嘢。」
為咗令到之後可以有所表現，我決定上網搵啲「參考電影」去激勵一下士氣。就响我坐埋電腦前嘅時候，我見到阿Wing 頭先未logout 個msn。原來，佢又同個八婆姐妹Macy 傾女人經。我嘅好奇心當然遠勝道德觀念啦！
「點呀？頭先買咗衫未呀？」
「買咗啦！成二千蚊。好貴呀！真係有必要咩？」
我第一時間心中大叫：梗係無啦！
「妳唔係想著上季衫呀？又係妳自己話怕失禮佢先話買嘅！」
「咁又係。我都唔想下星期失禮佢，又唔知佢班同事＆老細點係咩人。」
「死婆，扮偉大！妳起碼都賺件衫啦！」
「我book 定下個月嘅自助餐，當補償佢㗎！賤人！」
失禮我？我諗咗一陣，係！下星期公司annual，連我自己都差啲唔記得。阿Wing 當然唔知其實我公司annual 係流流地，而佢竟然咁重視。就响佢由沖涼房出嚟之前，我靜靜雞save 低佢password。
果晚，我無睇過任何大小電影，一樣「來去自如」。
阿Wing 嘅公主病一直都不時會發作，而每當我頂唔順咁濟果時，都會輕輕login 一下佢msn。
「又係妳話要睇戲，出到嚟又唔睇，想點呀？」
「我而家唔想睇呀！咁得未？」
之後，我發現原來阿Wing 想我同佢去睇愛情片，原因係佢話驚我對佢會無咗愛情嘅感覺喎！如果真係無，咁又會睇場有返嘅？真玄！Anyway，我果日堅持話要睇James Bond。
「大熱天時做咩要去BBQ 啫？」
「想食咪食囉！仲有，講明先，本小姐係唔透爐㗎！」
就响一餐食咗都背脊骨落又成頭大汗嘅BBQ 之後，我先知道原來阿Wing 知我好食肉，就想帶我去一個唔洗自己透爐嘅場，只係佢大頭蝦攪錯地方。
「妳頭咪打咗嚟問囉！係。未咁快走得。」
十五分鐘後。
「食晚飯？我而家仲响廣州喎！返唔切啦，太趕。」
三十分鐘後。
「好啦！好啦！我而家傾埋幾句就走喇！」
我其實唔明白點解要咁趕急要我由廣州返香港，再陪佢去茶仔食一個常餐。原來佢同Macy 另一死黨嘅男友，就係因為傾生意傾到同咗個大陸妹上床。而佢個friend 直到十一國慶果時，個大陸妹殺到嚟香港先知道呢件事。當然，個傻妹完全唔知道我其實北上傾嘢嘅對象係男人嚟啦！仲係個好豪邁嘅廠佬添！
上年，我難得攞到假，可以去一星期旅行。我當然首選去東京，但係就受到阿Wing 好強烈嘅反對。
「我唔明去東京有咩好囉！我個個friend 都同男友去歐洲。」
「去歐洲太貴啦！妳平日又叫我唔好洗咁多錢。」
「你去到東京咪一樣狂買嘢，唔係模型，就係啲毒男嘢！你仲細咩！」
「我有我自己興趣，有咩問題先？」
「有！你著緊啲玩具同漫畫仲多過我。而家我都唔係要去歐洲，只係想去韓國滑下雪啫！你咁都唔就我一次。要去，你自己去啦！」
如果唔係之後睇到佢msn，我都唔知原來阿Wing 同過佢前度去過東京。而令佢咁堅持唔去嘅原因，只係想我地兩個有一個獨一無二嘅回憶。
隨住whatsapp 取代咗msn之後，果次亦係我最後一次偷睇阿Wing 嘅通訊紀錄，因為我相信佢做嘅所有嘢，其實都只係著緊我地之間嘅關係。
一個愈無信心嘅人，就愈會武裝起自己。
到前排我地預備結婚，阿Wing 屋企人開天殺價咁要禮金。起初，我有埋怨佢點解唔幫下我口，而佢又對我有限嘅財政能力單單打打。就响我煩到頭爆果時，阿Wing 突然拋咗張投資戶口月結單比我。
「好彩同你一齊果時就知你無錢，所以叫你開定個投資戶口啫！指意晒你，真係婚都唔洗結啦！」
我一睇，果個原本只係擺咗兩萬蚊嘅戶口，兩年之後竟然有廿萬？！試問有邊個投資計劃係可以兩年間增長咗十倍！呢筆應該係佢平日慳慳埋埋嘅儲蓄。果一刻，我除咗上前抱住佢之外，真係唔知可以做咩。
係！阿Wing 的確係港女，佢睇錢好重，死要面子，自我中心，無理取鬧……但係响所有外殼之下，佢只係一個怕失去愛嘅女人。
She's just a woman fall in love!
柏原太賀 facebook：www.facebook.com/Kashiwabara30
