advertisement
你哋相唔相信世上會有一個同你好似樣嘅人？早前51歲嘅日本女星柏原芳惠推出寫真集，竟然同苑瓊丹神撞樣！唔睇真啲，真係以為係同一個人嚟，不過就好難聯想到一直以「扮醜」出場嘅「石榴姐」會行性感路線，令唔少搞錯晒嘅網民嘩然！
講起苑瓊丹，原來今年已經54歲，一直都唔介意醜化自己嘅佢，一啲偶像包袱都冇，搞笑嘅演出總係能夠令觀眾留下深刻印象，當中最為人熟知嘅一定係參與過唔少星爺嘅電影，包括《九品芝麻官》、《唐伯虎點秋香》同《食神》等，雖然只係綠葉，但佢毫無形象嘅大膽演出令每一套電影都生色不少。
事業上咁成功，感情上又點樣呢？早前苑仔接受媒體訪問，就話：「咁多年，我係一個不缺戲拍嘅人，亦係一個不缺男朋友嘅人。」喺苑仔心目中，拍拖係一個需要，佢自己都唔理解自己點解咁多桃花，身邊追求者不斷，實在太多選擇。小編就覺得，邊個話一定要靚先可以有男人緣？真正吸引一個人，最重要都係欣賞到對方嘅內心，苑仔可能就係有某種魅力令佢成為「萬人迷」。
終於，04年苑仔同「玻璃大王」黃乃揚秘密結婚，搵到佢嘅真愛。究竟有咩性格可以令到男生對你印象加分？
- 做自己
與其喺男生太做作，不如做返自己，勇敢俾佢知道你嘅真實個性，真係鍾意你嘅人唔止鍾意你嘅外在，更重要嘅係內在嘅性格。
- 細心
面對心儀嘅男生，細心留意佢嘅喜好，即使只係送一啲小禮物，甚至係遞一張紙巾，都係好加分嘅行為！
- 處事成熟
兩個人喺埋一齊最緊要係互相尊重，坦誠相對，因為少少事就大發脾氣嘅話，好快就會令人生厭同感到疲乏，一段關係裡面要相對付出先會有成果，所以係時候學習長大喇！
（圖片取自網絡）