對人存心傷害，多數不會成功。無心傷害別人的一記無情力，卻可能是意想不到的利刃，足以殺人措手不及。
假如你也像我一樣活了半輩子，又是否數得清自己傷過的人有幾多個？
******
日本之旅結束之後，簡單收拾好行李已經差不多三點，當晚睡了三個鐘就要爬起身收拾心情回公司開會。
當時後生，當然 okay，我更加可以提前半個鐘返 office，現在回想更加覺得年輕真好。
我拿着麥記早餐，走到公司門口，卻與 Mandy 撞個正着：
「妳仲諗住食嘢？Boss 要妳準備好上一季嘅開支報表喎，妳做咗喇咩？」
「老闆冇同我講喎。」
「所以佢叫我同妳講囉，九點就開會，唔通妳乜都未準備好？」
雖然整理公司文件是一件簡單不過的事，但本來想輕輕鬆鬆食個早餐，卻大失預算。
星期一多數由 Monday blue 開始，唯有跟自己講「預咗」，加多句「人工包埋」，咬實牙關，做啦。
Herman 教我正向思維方法果然有用，三十分鐘後，我把文件準備好走入 boss 房，只見 Mandy 和 Selina 一早已坐在房間內。
「妳拎住呢疊咩嚟？」Boss一問我當堂呆了。
「咪妳叫我做上一季嘅開支報表。」
「我冇叫妳做呢樣嘢，咪成日做埋啲無謂嘢，醒目少少啦。」
我即刻意會顯然這是 Mandy 隨口叫我做的事，並非 boss 的旨意。平時我應該一早察覺。是放了幾日假令我智商降低？
Boss 續說：「近呢幾個月市道好好，但係公司嘅 competitor 就愈來愈多，嚴重影響公司生意。呢半年嚟公司營業額一啲增長都冇。」
Mandy 表現得早有準備，似乎她的表妹在對家「卧底」有功，兼且有重要發現：「表妹喺 Neo Body 返工，上星期被通知會調佢去旺角新舖度做。」
Mandy 見 boss 望着她但沒有開口，她即刻繼續補充：「聽聞 Neo Body 已經簽咗租約，會喺我哋旺角旗艦店對面開一間新舖，3 月份就會開始營業。」
Boss 聽後激動：「妳表妹喺人哋公司度做，就係聽到呢啲消息？咁即係提早畀我知道有人會搶我生意啫，對公司有乜幫助呢？妳入咗嚟做都四年，公司生意妳幫到幾多？」
「其實我喺公司做咗五年半。」
「妳仲好意思講？而家市道好，我哋公司都唔可以乘勢擴充，正所謂不進則退。」
Boss 沒有繼續鬧 Mandy，反而轉向我：「Sheryl 妳做嘢咁快吖嘛，今個星期交一份 proposal 畀我，分析旺角 flagship 而家嘅客源，同埋嚟緊發展方向。」
「係嘅老闆。」
「如果生意仲係咁差，妳哋冇一個人可以再留喺度！」
所謂「開會」，我準備半個鐘，我和 Selina「你眼望我眼」甚麼也沒有發表，「會議」竟然不到十分鐘就結束。
「妳整呢疊嘢出嚟做乜？」離開老闆房 Selina 即刻問我。
「係 Mandy 話老闆叫我做嘅，唔通我唔做咩。」
「佢擺明想整妳，妳係老闆秘書，仲聽佢講？」
******
知道 Neo Body 將會於旺角開分店，老細叫我分析旺角店嘅客源。正好將我最近讀 master 學過的理論大派用場。
雖然之前 paper 有找 Herman 代筆，但自從他一句「以後只可以由我搵妳，妳唔可以主動搵我。」我除了心疼自己接受了與他不公平的關係之外，亦都為自己的學業打算：除非我再在茫茫人海再找人為我的 paper 代筆，不然一心靠 Herman 幫我過關的話，失控是遲早的事。
到時我和 Herman 的關係，我指望靠學業成為事業轉捩點，都會同時落空。
旺角分店是公司的旗艦店，flashback當時大約十年前，當網絡未及現時發達，iPhone 3 才剛剛推出市面，癡男怨女仍未識用 Tinder 互 flirt 的年代，旺角仍然是滿街 MK 仔女。
回想起來，那段日子可能是旺角全盤被異邦人佔領之前，屬於 MK 仔女最後的盛世浮華。
公司的旺角分店，就是那些初出茅蘆的女孩，瘦身脫毛護膚扮靚的集中地；雖然人流多，每個月 turn over 都大，但旺角亦不是公司最賺錢的分店，boss 都沒有投放許多心思在這間分店上。
我雄心壯志想整理分析公司旺角店的帳目，再向 boss propose 我的行銷策略。不過因為公司生意額算是集團機密，所有資料都存放在內聯網，不能在家操作。
我的報告將近寫起，忽然想起 proposal 當然少不了提一提我剛入職時的代表作，「二人同行 一人半價脫毛 plan」，回想起來已經是大半年前的事。最記得當時令到公司營業額上升近倍。
其中一單生意更加因為有十個大學女生一起相約購買療程，之後為公司開拓學生市場，令到 boss 印象深刻。
但是在內聯網的資料入面，竟找不到這單生意的記錄。
本來 OT 到 9 點，想將年輕女性市場分析這題目加到 proposal 入面，但找不到我那份代表作，實在心有不甘。
公司同事都已經放工，剩下我一個留在辦公室奮戰到深夜……
Proposal 死線之前一日，剩下我一個在電腦前作戰的景象，那份熱血可能是可一不可再。
我還記得當晚公司燈光全熄，兼且發生了一個意外，令到這件事真的變成是可一不可再。
當時是夜晚 11：30，我一個人對着屏幕工作，竟然見到 boss 跟一個我素未謀面的男子深夜返回辦公室，她以為公司沒人，見我一個人留在 office 感到愕然。
「Sheryl 妳做乜仲未放工？」
「整緊份 proposal，好快搞掂。」
「妳嘅私事我唔想理，妳有乜嘢要搞到咁夜？」
「check緊旺角分店上年 summer program 嘅營業額。」
「妳以為自己係大學生就乜都識？呢啲嘢交畀會計 Mona，半個鐘都搞掂啦。」
「我仲爭少少整起個 proposal。」
老闆一手搶走我手上那疊文件。
「叫妳放工，聽朝我搵 Mona 搞掂，唔駛妳理呢啲嘢。」
顯然是我的出現令到 boss 感到尷尬。我也不敢多望一眼她邊那男人，轉身拿起手袋離開 office。
******
第二朝返工，已見 Mona 和 Mandy 在老闆房。三個女人在房內一直沒有出來，公司氣氛也異常凝重。
你可以想像一個有超過二十名女員工的辦公室，竟然可以一個小時之內完全聽不到有任何對話，只隱約聽到疏疏落落的打字聲，那種感覺如置身鬼域。
直到差不多到中午食飯時間，只見 Mandy 從 boss 的房間步出，她望了我一眼，眼中有恨，又好像泛有淚光。
「我勢估唔到，我會衰喺妳呢個表面單純嘅女人手上！」
Mandy 將我檯面所有物件掃落地下，我來不及反應，她已推開大門離開 office。
這也是我直至現在，最後一次見到 Mandy。
******
後來我才知道，當天早上 boss 把旺角店全年前的帳目交給 Mona。Mandy 一向是負責公司旺角和尖沙咀兩間分店的帳目，但由於 Mona 一查之後，難以向 boss 交代我所指出那項消失的帳目，發現可能是 Mandy 刻意隱瞞。
會計 Mona 一下子發現 Mandy 穿櫃桶底，為了表示自己作為公司財務大臣的誠信，她把事情向 boss 和盤托出。
雖然十個客人的療程涉及的帳目不過五位數字，對於 Adore Beauty 根本不是甚麼一回事。
正所謂一次不忠百次不用，何況「不忠」正是boss的死穴，這件小事足夠令Mandy在老闆心目中人格被產。
就這樣，雖然 Mandy 曾經是老闆身邊助理，卻因為數目極細的一次刻意隱瞞被炒。
而 Mona 亦因為失職而被老闆大罵一場，對於一位公司老臣子來說，絕對奇耻大辱。
此事之後，公司同事都認為這次 Mandy 被炒是我儲心積累，清除眼中釘的所為。我在公司的形勢更進一步被孤立。
（待續）
>>上一集
>>從頭睇
love channel 分享、意見、查詢：she.love.sex.channel@gmail.com
