advertisement
每次女朋友見到我都會周身病痛，這個詛咒就好比哈利波特每次看見佛地魔，額頭上的疤痕就會隱隱作痛一樣。我甚至有懷疑過，自己的時辰八字跟女朋友是否相剋，才令她經常頭暈身㷫。
「你睇吓，我返工時唔小心，隻手指畀紙割到……」她展示手指上，要用放大鏡才能看得清楚的傷口給我看，可是她的表情卻跟整隻手被斬去一樣。
「咁妳想我用口水幫你療傷，定係幫妳啜返啲毒出黎？」我剛擘大口，她就把手縮回去……
「我個膊頭唔知點解好痛，硬到好似石頭咁……」又有一次，她跟朋友逛了一整天街沒事，跟我見面就立即出現病痛了。
「試吓我隻神之手，頑石都點頭啊。」
「我個胃好痛……」這句說話跟她手上拿著的雪糕很有違和感。
「咁我幫妳食埋杯雪糕佢。」
「呢度冷氣好凍啊，就快凍死我……」剛進戲院，她便嘴唇發白連臉都青埋。
「成日唔記得帶褸，成個電影業都畀你搞彎晒…」我將凳柄拉高，坐近去摟著她。
我曾經問過她的朋友同事，他們都明明說她平時身體很壯，連公司飲水機換水都是她來的。我除了罵她同事為何不找男同事換要我女朋友來換，還發現到……
女朋友只在我面前才病發的原因，是她患了一種叫「關愛渴求症」。只會在男朋友面前才發作，而且病症飄忽，一時頭痛一時牙痛，連蚊咬都彷若被蛇咬到一樣誇張。
遇到這種病患者，也許你會感到很煩厭，很公主病。但千萬別忘了，這種病的最特別之處，是只有男朋友才能醫治。
ig：BlueGodZi
