貽興︰
你好，有些問題想請教一下。
首先交待一下我男朋友的背境（景）。我男朋友是個超級超級靚仔+幽默的鬼仔，但係好窮，哈哈，來香港讀書的。
我地一齊半年了，一開始佢曾經同我講過，從來未試過同一個女仔一齊超過三個月的，當時我心諗「你份人梗係好有問題」。
佢雖然係窮「鬼」一名，但係佢好識令女仔開心，又會玩下浪漫整下candle dinner，同我去行下山游下水，一齊去書局打下書釘，睇下碟，我地相處得幾開心，大家成日講笑互寸對方，像戀人又像朋友，大家又有共同嗜好，話題永遠源源不絕。
俾起以前的男朋友，佢就經濟方面差d（我之前的ex 對我好「豪」的，會送袋送鑽石送名表那種），但同佢一齊那種開心，係比收到十個Chanel 袋更加開心的。加上我知佢好窄（窮），所以我會主動夾下食飯錢俾佢，有時又會買下d 日用品小禮物俾佢。
我從來都唔expect 同佢會開花結果，正所謂人鬼署（殊）途，加上佢讀完呢幾年書可能會返老家，所以我都係今朝有酒今朝醉，同佢hea 得幾耐得幾耐。同佢初初一齊，其實巳經知道呢條死仔花心到爆（咁靚仔點會唔花），同圍同女flirt（睇佢個facebook 就知），亦俾我捉過佢兩次偷食。初頭知佢偷食我發晒癲又哭又鬧，亦為咁分過手一個月，但之後大家又起返埋一齊。無計自己貪靚仔，身邊d追求者even 有經濟但係悶男又無feel，所以都係同番佢一齊。
今日我買咗餸上佢屋企煮飯仔佢食（佢一個人住的），佢喺房度做paper，我就喺佢廚房做阿四，無意中俾我喺個垃圾筒發現咗個用個（過）的避孕袋和包裝紙！頂！
我睇到成個人暈得一陣陣，但我同自己講：「唔好發癲」，經驗話我知，一吵大鑊d男人實會老羞成怒的。於是我將個二手避孕袋同個包裝紙扔在廚房地下牆角，然後若無其事繼續煮飯。
佢一入到廚房見到佢個袋，嚇到佢面色一變，但佢見我若無其事仲笑住囗同佢講「babe 好快有得食」，佢以為我睇唔到，九秒九咁將佢d 遺物拾起扔了。
全餐飯我地有講有笑好似平時一樣，但feel 到佢眼神勁閃縮，食完飯我地入廚房食煙，我瞄住個垃圾筒然後陰陰咀笑，佢即刻低頭唔出聲，跟住我笑笑囗話「聖誕除夕連重慶大廈都要幾千蚊晚，你梗係借咗間房俾你d 男性朋友帶女仔返嚟玩啦，玩完d 垃圾亂咁扔，我知你一向好整齊的，所以我知唔關你事。」然後我即刻攬住佢同佢講I love you，之後我叫佢返房做paper，幫佢洗晒d 碗碟，成晚繼績若無其事。
貽興，想請教下你，我這次處理的手法對嗎？會弄巧反拙嗎？
P.S. 我知道如果我問任何一個女人，都會叫我九秒九扔咗呢件賤男，但問心，十個男人九個滾，差在有無咁唔小心被發現。加上我仲好鍾意佢，遲d 俾我識到個我更有feel 更夾的，我自然會九秒九扔佢的。我知佢讀完書有機會返老家，我只想同佢開心得幾耐得幾耐。
小貓
小貓：
告訴你一個秘密吧：越賤的男人，越是不能認真。你一旦認真，何止輸了，簡直是死定了。
你很聰明，也很有天份，這回事，能夠如此不動聲色不發作的，大多擁有別人沒有的慧根，你的愛情，也註定跟大部分人不一樣。
其實像你這種做法才是最高章的。對付這種靚仔賤男你能怎樣？反正他裝一會死狗又會繼續搞其他女人，他嬉皮笑臉你哭得像豬頭究竟是誰比誰可憐？
大吵大鬧沒錯是能夠把情緒統統發洩，但又能有什麼用？最後只會大家撕破臉皮，對方無奈離去，你失去一切，空餘一段想起還會咬牙切齒的記憶。
只是世上沒有多少女子像你這樣透徹，不上心，才不會輕易傷心。我常說，愛情裡往往是沒那麼上心那個才佔上風的。現在你已經完全佔了上風，如果他偷食無法傷你的心，那麼，你不過在養著一隻喜歡跑出去亂配種的名種狗公，你有牠有面子，牠搞其他狗乸你不覺難過，反正你很清楚自己不過是貪靚仔，各取所需，我尋你開心，你尋我開心，為什麼還要被世俗枷鎖束縛？
反正一哭二鬧都不可能挽回他的心。你以為他以前那些女友沒試過？如果我是你，索性把這個玩大一點，你越大方，他越內心有鬼。反正他搞其他女人的同時，你也可以照騎其他靚仔，誰也沒欠了誰，只要別笨得花錢貼仔，不相信山盟海誓，時間一到，他回外國去，你找其他更鮮嫩的年輕靚仔，好來好去，也是美好回憶。
怕就只怕有天你忽然認真。
祝 無心可失
貽興
