警告
自從上次Vincent幫我擺脫Chris之後，我覺得Vincent對我多咗種唔自然嘅關心。佢會不時whatsapp一啲資訊性嘅message俾我，例如放工嗰時嘅突發路面消息，又或者幾日後氣溫急降之類。雖然呢啲都唔係咩曖昧訊號，如果係普通同事之間，你會當係聯誼嘅手法。不過，我畢竟係佢上司。
而且，最令我不安係佢會趁我返到公司，入咗房之後，傳句「早晨」俾我。
「妳覺得佢咁樣有無問題先？」今晚，我約咗Bella，同佢講呢件事。
「唔滿意嘅，咪出warning letter俾佢囉。」Bella答。
「咁點得呀？普通打招呼啫。」我不加思考就回應。
「妳自己都識講啦！『普通』打招呼呀！」Bella有些少晦氣，繼續講：「阿Purple姐，我覺得而家妳似曬命多啲囉。人哋對妳好少少，妳就驚佢食咗妳咁。就算驚，都佢驚先啦！」
「但係妳唔覺得古怪咩？」
「首先，妳唔好太高估自己。以Vincent嘅條件，應該大把後生囡囡會主動埋身，點解會睇上妳先？其次，妳而家只係估佢可能、或者、maybe、 perhaps對妳有意思。只要佢無任何行動的話，咁只代表佢平時 J 開啲成熟魅力嘅姐姐。妳都同唔少男人搞過啦！多個靚仔小鮮肉 J 下啫，唔係介意呀？」
「我係怕佢真係有咩行動，到時唔知點收科咋。」
「係又點呢？難得個小鮮肉對妳有好感，妳又唔係食齋嘅，咪試下囉！」
「我唔想喺公司攪男女關係嘛。」
「妳咪同我吹水啦！之前未試過咩！」
Bella講緊嘅係我上一份工，同我當時老闆嘅事。嗰次之前，我完全無諗過會做人第三者。直至有一日，突然間有個由加拿大返香港嘅女人，上嚟公司打咗我一巴之後，我先知自己原來一直做緊令自己傷害至深，又最不齒嘅角色。
不過，無論咩原因，當一條底線斷開之後，就只有一個無底嘅深坑。亦因為呢次經歷，我反而同咗歐生一齊。
「唉！」Bella長嘆一口氣，續講：「咁不如妳求其搵啲嘢鬧下佢，鬧到佢怕為止啦！」
「佢又無做錯嘢，唔係咁好呀？」我表現猶豫。
「我就唔信會一個下屬做嘢係完美嘅。就算程序同內容咩都啱晒，妳都可以因為唔啱心水話佢㗎嘛。反正，未婚中女上司一向都俾人覺得係變態㗎啦！」
我點都估唔到就喺我同Bella講完嘅第二日，我就對Vincent破口大罵。
「Vincent，呢啲咩嚟㗎？」我叫咗佢入你，打開一份文件問。
「呢個酒店project就快埋尾，interior嗰邊問我哋對床有無意見。我覺得床對一間hotel嚟講好關鍵，所以就拎埋啲資料俾妳。」Vincent答。
「你知唔知咩叫tender？點解我哋要俾嘢sub-contractor做，而唔係自己做晒呀？」
「唔好意思。我叫返interior嗰邊去做。」Vincent想轉頭就走。
「你同我企喺度！」我突然一陣無名火起，大大聲同佢講：「分判除咗係成本問題之外，仲係責任問題。佢哋報標前已經有晒清楚嘅specification，就要跟住去做。下下都我哋比意見，唔係代表班sub仔（sub-contractor）尊重你，而係有咩都可以卸落嚟。要professional，唔止要有專業知識，仲要知道咩人要take 咩responsibility！你嘅表現，係話比我知咩叫唔夠班！」
我一口氣講完之後，Vincent應該係嚇呆咗，而我亦為自己嘅過態感到尷尬。突然之間，相望無言嘅我哋，反而似一對講分手嘅情侶，多於上司同下屬嘅關係。
「Sorry！我知點做。我出返去先。」
Vincent 出咗去之後，我攤咗喺張根本唔啱女人坐嘅真皮大班椅上面。其實我火到咁樣話Vincent，並唔係一心要佢對我保持距離，而係基於一件令我非常討厭嘅事——床。
曾經，我係非常喜歡瞓喺床上，甚至到達沉迷嘅地步。因為，當時有佢；當時以為會一直擁有佢。
佢係我嘅初戀，亦係我生命中第一個男人。回想細個嘅時候搵男朋友，外形佔好重要嘅比重。聽起嚟，好似好膚淺咁。不過，人大咗之後，以經濟同社會地位，去決定同咩男人扯上關係，其實係唔係仲膚淺呢？
同「佢」嘅第一次，我永遠都記得。喺某個Summer semester嘅下午，佢通知我屋企無人。之後，我帶住心理預備去佢屋企。
佢白淨嘅裸體被黃昏的陽光沾上些微金黃，顯得有啲耀眼。我望住佢嘅頭髮喺我正上方，旁邊一對結實嘅膊頭同手臂，重重咁握住我無意反抗嘅手腕。因為佢嘅臉微微上仰，所以我只係見到佢嘅下巴，不過向前望又有另一番景色：挺出嘅胸膛，剛好掃過我嘅乳尖；緊縮嘅腹肌，展現年輕獨有嘅熱血奔騰；扭曲嘅腰臀，以唔算勉強嘅角度壓向我下身。
佢嘅熱情深深嵌入我緊繃同青春嘅肉體，令我身上嘅處女芳香從破洞流出。但係飄散，繼而消逝嘅香氣，並無令我感到痛苦，反而似欣賞完一首繞樑嘅樂曲之後，懶洋洋得唔願睜開雙眼。
「妳唔後悔？」佢問。
「只要你以後都愛我，我點會後悔呢？應承我，一生一世，好唔好？」我要求一個真誠嘅答案。
「好。一生一世。」佢答得毫不猶豫。
於是，我堅定不移咁相信佢嘅說話，亦允許佢毫無保留咁將對我嘅激情、日常嘅鬱悶、工作嘅不忿、家庭嘅壓力……傾注到可以讓佢陶醉於爆發瞬間嘅容器，即係我。而承受我擺出無數異教徒一樣動作嘅床，就成為我最好嘅拍檔。
有好幾次，我懷疑自己到底係同「佢」，定係同緊佢張床做愛。
不過，「一生」只過咗一少部份後，情況有變，我發現懷孕。仲記得當我抱住萬分喜悅同感動嘅心情同「佢」講嘅時候，佢眼神閃過一刻憎恨同厭惡。雖然「佢」答應會喺生咗小朋友後補辦婚宴，但由嗰一刻開始，我感覺到佢張床慢慢變得唔再歡迎我，甚至開始疏遠我。
係我遲鈍，竟然喺我親眼見到佢有新女主人嘅時候，先發現原來「佢」已經唔再屬於我；亦從未屬於過我。
就係咁，我離開咗生命中第一個男人，亦因為過份悲傷而無帶新生命嚟呢個世界。同時，由嗰一開始，我無辦法再喺床上做愛。
（待續）
柏原太賀Facebook：
