「Hi！我叫梁寛。」
如果當你聽到呢句對白，竟然唔知係來自鄭丹瑞飾演嘅經典角色的話，恭喜你！證明你可能好青春，又或者精神上可以自我滿足，而唔需要靠外來娛樂。
不過，就算你知定唔知，我都諗住喺呢段要盡量留喺屋企嘅時間，介紹你重溫呢輯差不多 30 年前播出，前無古人，暫時後無來者嘅電視劇經典——《摩登小男人》。
13 集嘅故事係咁嘅，話說有個唔太知女人點諗嘢嘅小男人——阿寬，佢既善良，又怕事，但竟然畀佢娶到一個靚老婆—— Ann 許（朱慧珊飾演）。不過，老婆頂唔順佢 30 歲人，仲吊兒郎當，決定同佢離婚，仲立即有其他男人追添，完。
你可能會問就係咁簡單，咁有咩好睇呀？
好睇嘅地方係當阿寬嘅老婆決定同佢離婚之後，呢個把嘴好硬，但原來內心相當掛住老婆嘅小男人，竟然畀佢遇上一個又一個女人，仲同佢發展咗唔同嘅感情添。
有人話，男人有三大願望：升職，發達，死老婆。
不過，阿寬用 13 集嘅劇情話畀你聽，其實男人都可以好長情同深情，只係唔識表達啫。雖然好多時候男人明知後悔都會照做，但偏偏呢個小男人就把持得住，決心要同老婆重拾舊好。
唔容易㗎！特別係當你喺最失落嘅時候，遇上嘅女人包括關之琳、劉嘉玲、吳君如、李嘉欣、于莉、毛舜筠、吳雪雯、陳玉蓮、黎姿……，如果話阿寬係 90 年代初最有豔福嘅男人的話，我諗唔會有人反對，呵？
而最神奇嘅係每次當佢遇上一個女人，有時懵懵懂懂，有時意亂情迷之際，就會有一個當時得令嘅歌手突破四次元咁走出嚟，唱隻歌畀阿寬聽，令佢對愛情有種似懂非懂嘅領悟。之後，又會有重量級嘉賓嘗試分析同預測呢段關係。
雖然阿寬身邊有好多損友，但佢反而從損友嘅經歷，又或者醉後嘅空虛，令佢更放唔低老婆，決心喺新追求者手上，搶番老婆返嚟。
當然，你會喺最後一集發現，原來阿寛同老婆嘅關係早早已經受到祝福，仲係打風都打唔甩。因為佢老婆嘅初戀竟然係黎明，而最終同咗呢個小男人一齊。到結婚嘅時候，主婚嘅神父係張學友，連幫阿寬箍煲去追番老婆嘅，仲要係劉德華添。
一個單純嘅男人，一段失而復得嘅婚姻，喺如今仿似世界末日嘅疫症之下，顯得更珍貴，更溫暖。
不過，差不多 30 年之後，佢點睇當年同老婆嘅愛情呢？
人類嘅歷史同個人經歷其實係一樣，有困難嘅時候，亦有黑暗過後嘅期盼。一個小男人嘅堅持，只可以盡量掌握自己嘅愛情。但當所有人都學識珍惜的話，世界嘅命運，或者就會有少少唔同。
希望大家保持純真嘅心，搵到生命中陪伴終老嘅人，互相支持，共同渡過難關。
特別鳴謝：健康．旦 YouTube Channel
柏原太賀 facebook：https://www.facebook.com/Kashiwabara30
圖片來源：互聯網
