對於很多女人來說，約會網上認識的陌生人已經不是一件新鮮事。況且我只是為了自己的功課，一個多麼冠冕堂皇的藉口。然而真相是，這份找槍手完成的功課從頭到尾都是不能見光的檯底交易，隔十年、廿年都好，也是不能改變的事實。
還有一件事，我第一次和Herman Lam見面，他就肆無忌憚地開玩笑，一支Lafeit已可以把我弄得又惱又笑，還有到最後，他還逼我接受了他的禮物。
我要多謝一個素未謀面的男人對我花這麼多「心思」嗎？還是及早要遠離這個陷阱，過我的平凡生活呢？
或者妳也知道，如果我選擇了後者，這故事已經說不下去了。
******
在我和Herman初次見面一星期之後，我收到他的電話。
「份功課如我所料，有B嗎？」
「錢你已經收咗，我亦冇義務將個結果講畀你聽。除非係貨不對辦啫。」
「冇打嚟，即係收貨啦，fine.」
「份paper交咗，但係未派番返嚟，如果個grade唔滿意，我唔會收貨㗎。」
單是對話當中互相挑撥的語氣，已經很有flirting的意味。
「本來打嚟諗住如果分數唔滿意，同妳賽後檢討下，而家似乎未有呢個需要。」
「你想檢討嘅，似乎係其他嘢喎。」
「例如呢？」
「你唔係想望下你送畀我嘅鏈墜，我戴得好唔好睇咩？」
「星期五，我去妳公司樓下接妳？」
「……星期五多數要OT，我到時再call你？」
一支96Lafeit、一餐燭光晚餐、一份小禮物，三件事同一時間發生，突兀得來又顯得理所當然。而Herman相隔一個星期才來電，是因為想引我主動聯絡嗎？所有事情都引起了我對他的無限好奇。不過我依然記得自己有男朋友，所以Herman說要去公司接我時，我是猶豫的。
至於這份猶豫並不是來自「女朋友」這個身份，而是怎樣安全地跟另一個男人約會。
在一間有50個女員工的公司工作，若被任何一個人見到有一個陌生男人接放工，可以帶來的麻煩，可能是連香港CEO也難以想像的。有少許智商的人，總會不能因為一時的快感而自尋煩惱。
不過，世上沒有免費午餐，一切事情都有代價。這個道理我早早已經學懂了。
******
我只見過Herman一次，未正式第二次 date 已經被 Him 懷疑。其實也證明了我一直的想法：所有事情如果不留痕跡，根本和沒有發生過一樣。無論是約會、偷情、出軌、犯禁、破戒，甚至只是減肥時偷吃一口雪糕，心底裏其實都很想有人知道。沒有觀眾的戲，做給誰看？
「妳咪好鍾意Natalie Portman嘅，星期五我哋一齊去睇Black Swan？」
「星期五我唔得閒，約咗人，星期六先睇啦。」
「妳呢排成日都話好忙，妳其實做緊啲乜？係咪又喺messageboard度賣嘢，約人交收呀？」
「唔係，我都唔係等錢使，不過有啲嘢忙緊。」
「妳有乜嘢瞞我。」
「……我呢兩個月讀緊master。」
「讀……書？咁大件事，點解之前冇同我講過？」
「你點解咁嘅語氣？我就係唔想讀到半路中途放棄，畀你笑我嘛。所以，咪唔同你讀住囉。但係我真係讀到喎，都交咗兩份paper添，教授仲話我做得好，第二份paper明顯進步，有B grade。」
「我由頭到尾都唔覺得妳鍾意讀書，由識妳時叫我幫妳賣嘢拍片，到妳喺公司上位，我都覺得妳係以小聰明取勝，而唔係鍾意進修嘅人。」
「你係咪覺得我有爭勝心，學歷高過你，你唔開心？」
「我冇唔開心，我只係講事實啫，都唔係想 hurt 妳，更加唔係覺得妳 hurt 到我！」
「原來我咁唔重要。」
「我知你想睇呢套戲，我今晚去買飛啦！星期六朗豪坊，OK？」
知道Him有少少動氣，我即刻扮傻打圓場。一來不想二人相處太多沒有結論的爭拗，二來也是因為自己心虛……
******
星期五Herman約我在天星碼頭等，但我OT之後又行錯路，要他等了我半個鐘。
「唔好意思，我行錯路搵極都搵唔到呢度。」
「小姐，妳未嚟過呢度咩？早知約妳去 Landmark。」
「我前幾年去咗日本讀書，天星拆咗我都唔知……」
「估唔到妳外國留學都要搵人幫妳寫 paper。」
「我之後會慢慢 pick up 自己寫，如果你肯教我就最好啦。」
「My pleasure. 我今日冇揸車，一齊坐船過海？」
「好吖。」
正值 Happy friday 我穿着都比較隨意，黑色一字膊襯衫和十年前每個女生都不只有一條的超貼身牛仔褲，當然還有 Herman 送的鎖匙頸鏈。或者因為累積了一天的疲累，我和 Herman 的對話少了針鋒相對，把當初那份戒心除除卸下。
落船後，Herman 帶我到一間位於商業大廈的會所餐廳，地點相當隱蔽。Herman 預先安排一間連露台的包房，微暗的燈光下，香港島的維港景色盡收眼底。Herman 打開話題。
「其實上次我係第一次開 96 Lafeit。」
「聽你講酒講到頭頭是道，以為你已經試過呢支酒，再介紹畀我添。」
「真係新體驗，同約妳見過一樣。第一啖有少少酸，第二啖就順喉好多。」
他說時語帶相關，令我有點尷尬。今次晚飯沒有開紅酒，改飲香檳。
「多數女人都鍾意 champagne，Sheryl 妳呢？」
「我其實好少飲酒，之前日本留學，會同朋友食下燒肉，飲下啤酒咁囉。」
「好在妳應該都飲得，唔係今晚唔知點抱你返屋企。」
「如果唔飲得，我唔會勉強自己，做人要有自知自明。」
「Well said.」
我不自覺將自己日本留學的往事告訴 Herman，我對這個第二次見面的男人完全沒戒心。是因為他 decent 討好的外型？他開酒的那份豪氣？還是他底蘊裏的才華？有人說過，女人都是慕強的動物，男人愈展示自己的本事，女人愈容易不自覺地怦然心動，我已經在短短時間內，被Herman 徹底征服了。
晚飯過後，我和 Herman 在露台享受晚風。我俯瞰街上，尖東海傍疏疏落落地，是一對對經過一個星期辛勞工作後，互相依偎的戀人。跟那些情侶不同的，我深深知道，自己和眼前這個令我心生好奇的男人，並不是情侶關係。
可是，我和 Herman 卻以另一個角度，跟他們欣賞同一個維港美景，只是除了視野的分別外，還有瞬間優越的虛榮。
當晚有點微涼，Herman 趁機抱住我的手臂，而我也沒有拒絕。突然，他伸手輕輕拿起我胸前的心形鎖匙吊墜。他突如其來的舉動，令我有點失重，手搭在他的胸膛上。
「好襯妳。」
「多謝！」
他的臉跟我貼得很近，酒酣耳熱之下，我和這個第二次見面的男子不自覺地互相獻吻。
「我哋好似飲多咗……」
「定係飲得未夠多？」
「你想灌醉我咩？後果自負喎！」
「或者，我就係等妳醉。」
「呢度幾點閂？」
「The end of the night.」
我們這一夜，才剛剛開始。
(待續)
>> 上一集
>>下一集
>> 從頭睇
love channel 分享、意見、查詢：she.love.sex.channel@gmail.com
