未必人人記得香港哪一年開始有 facebook，不過我就好記得係 2008 年。facebook 的 relationship status 改變了人與人之間的溝通方式，若果得到情人的 facebook 認證，彷彿是個人履歷以外的另一種身份象徵，也是在朋友面前可以沾沾自喜的權力。
就是這一年，我開始 in a relationship with Him.
我和 Him 的關係算特別嗎？在網上因志趣相投而認識，兩年後才正式成為男女朋友。這種由朋友開始的關係，十分傳統之餘，又是人們一直羨慕的「由朋友發展成情人」，我算是身在福中嗎？
年輕人拍拖都是吃喝玩樂、無憂無慮。我和 Him 都喜歡日本文化，食飯、睇戲，放假去邊度，其實都幾難有分歧。兩個人相處最大的「爭拗」，可能只是因為他對我搵工方面提出太多建議。
「Sheryl，我自己都好鍾意日本文化，好好彩可以搵到一份日資公司嘅工作，但係未搵到都毋須太執着，妳咪做住其他工先囉。」
「你叻囉。你做到，我做唔到。OK？」
「我唔係咁意思。妳搵份工做住先，有啲工作經驗，之後都就搵份更好嘅。」
「你係咪覺得我成日冇嘢做，日日要見面好煩吖？」
當時的我，覺得 Him 只是大我兩年，但就經常以人生導師的姿態，對我找工作、待人處事各方面提出意見，我都不太受落，反而覺得煩。
不過，由我堅持去日本留學那刻開始，與家人關係已經不算很好。畢業之後，在家量地幾個月，自己都不好意思。
大約十年之前，減肥、脫毛等療程十分流行，而我自己又喜歡扮靚，雖然找不到日資公司工作，也想於美容行業發展。Him 知道我終於放下身段，不堅持找日資公司的工作，當然大表支持，更身體力行，陪我去見工。
「成日聽人哋講話父母陪仔女見工，而家有男朋友陪妳見工，係咪覺得好 sweet，有呵護備至嘅感覺呢？」
「我都冇叫你嚟陪我。」
「我知道妳都想我陪下妳支持下妳嘅，妳一陣畀心機，如果妳見工成功，我請你食嘢做獎勵啦。」
「又係請食嘢，似係想我變肥妹多啲囉。」
「妳肥咗，咪身材正囉。總之，妳畀心機啦。」
「嫌我細呀！到咗大廈門口喇，我自己上去都得啦！」
「我陪埋妳上去啦！」
可能自己都未算好 ready 返工，根本就覺得見工只是一個過程，沒有這樣容易一擊即中，甚至只是一個拍拖節目。
Him 陪我到公司門口，竟然被一個準備入內，刻意打扮年輕的中年女子撞個正着。Him 與這個中年女人面面相覷、四目交投，只好尷尬一笑轉身離開。
幸好我要見的，不是這個女人。跟我面試的，是一位束一頭中長鬈髮，非常瘦削的女人。雖然從事美容的女人，眉毛都修飾得特別精緻，皮膚白皙光滑，就連一個粗大的毛孔，一丁點面部瑕疵都沒看出來。但憑我多年來閱人的直覺，眼前的瘦女人最少也有四十歲。
「妳喺日本留學返嚟，點解唔搵日本公司嘅工？」
「因為我鍾意扮靚，想做從事有關美容嘅工作。貴公司有四間分店，喺行內咁出名，希望妳畀個機會我為妳哋公司服務啦。」這句話，在我內心已經默念過無數次，練習到連自己都信以為真。
「妳話你鍾意扮靚，但係 ITEC、CIBTAC、CIDESCO 呢啲國際美容認證，妳一個都冇?」
她一問，我即時啞口無言。
瘦女人再看了看我的履歷，問了我一些見工常見問題，不消十分鐘就送我到門口，叫我回家等消息。
步出大廈門口時，Him 已經在轉角處等我，我即時把我十分鐘的見工經歷告訴他。已經有相當工作經驗的他，也覺得我這次見工應該無望。
令人意外的是，大約一個星期後，我收到這間美容院的電話，叫我星期一去上班。
而後來我才知道，見工時在公司門口碰面那位打扮強裝年輕的女人，正是這間 Adore Beauty 的老闆。
******
瘦女人的名字叫 Selina，對於我自己沒有任何美容經驗都被聘用，事後她告訴我：
「公司寫字樓都係做啲文職工作，唔識美容其實都唔係太大問題，我覺得請個靚仔返嚟都 OK 㗎。」
「咁後尾點解冇請靚仔，但係請咗我嘅？」
「都冇靚仔上嚟見工，得個肥仔上嚟見工咋。妳又識日文，可能對公司日後拓展市場有幫助，咁咪請咗妳囉。」
她雖然是說笑的口吻，但總算解決了我心目中最大的疑慮。
我在香港幾乎沒有任何工作經驗，但很快已經適應了Adore Beauty 的工作環境。在短短兩個月之中，令我發現在中小型公司工作，待人接物的技巧往往比工作能力更重要。
曾經在日本留學的我，當然熟悉當地人禮多人不怪，事事先切想對方感受的思考工作模式，對於我日常做事十分有幫助；而在日本一直與非親人同住的我，掌握與陌生人同處時的分寸，於我來說更是毫無難度，甚至可說是得心應手。
Adore Beauty 的辦公室多是一些由美容院晋升上來的管理層，雖然她們對覺得我這個「大學生」是異類，但尚算尊重。我與她們相處算是十分愉快。
Selina 有一次更明言：「Sheryl 妳做事爽快又識人情世故，如果唔係睇過妳份履歷，真係唔信妳係初出茅蘆嘅大學畢業生。」
可能因為我年紀輕，許多事情 Selina 都對我特別寛容。雖然她的鬈髮、瘦削與蒼白令我不其然聯想起柏原大和，但相處下來她卻是一個非常隨和的人，有時更會和我說心底話：
「Sheryl妳都幾幫得我手，有時有妳呢個後生女喺度，公司都多咗啲生氣。但係呢幾年同行愈來愈多，公司年中可能要 cut 咗長沙灣間分店，今年年尾都唔知可唔可以留妳嚟度。」
在 Adore Beauty 幾乎毫無壓力的工作環境之下，我忘記了自己當初只當這份工是水泡，一心在等機會應徵日資公司，充滿熱血的自己。Selina一句話，令我想起剛剛回港時的初衷。
日常處理文書工作以外，我開始上網找工作，在求職網站找到合適的工作不多，間中寄出的履歷也只是「讓子彈飛」，一去不返。
跟 Him 拍拖近一年，已經慢慢遠離 messageboard 的我，因為返工無聊再上網找人吹水。可能因為本身已有男友，對於終日找網友 flirting 的 relationship messageboard 其實不太感興趣，卻再次發現 messageboard 的營商機會。
踏入 5、6月，身邊同事都在為 Adore Beauty 的 summer program 而傷腦筋，於是我就抓緊機會向 Selina 獻計。
「Selina公司今年係咪會推出夏日脫毛療程？」
「係啊，今朝 boss 同我哋開會，話最多只可以做到七折。唉！咁好難做，呢個價錢好多間都做到㗎喎，我哋憑乜嘢同人競爭？而家連啱啱新開嗰間 Neo Body 都做緊七折啦！」
「我以前係日本讀書嘅時候，成日都喺網上賣美容產品，我相信美容療程都可以試下網上銷售！」
「上網呢啲嘢我唔係好熟喎。」
「如果妳信得過我，可以交畀我負責。」
我將閨密優惠「二人同行，一人半價」的優惠消息發放到 messageboard，由於之前用假 account 多個分身聊天、識人已經相當熟練，很快已經營造到一個結伴同行的氣氛，出 posts 一星期，幾間分店已經 full booking。不單止令到 Selina 進一步認同我的工作能力，更令本來幾乎完全不認得有個這位員工的老闆看見我，對我另眼相看。
大家有冇聽過「朝三暮四」出處？古時有人養了一隻㺅子，主人為㺅子提供早上三升、晚上四升橡果，㺅子覺得不夠，於是改為早上四升，晚上三升，㺅子竟然開心到不得了。七折無人問津，我變成一人半價，實際上只提供七五折優惠，反而引來更多人幫襯。古代用於㺅子身上的騙術，今時今日用在人身上，一樣work。
年輕的我，經常不知不覺賣弄小聰明。老闆見到我的表現，其他人都見到，一時令自己鋒芒太露，最後都難以避免要承受後果。
（待續）
>>上一集
>>下一集
>>從頭睇
