警告
可能因為諗起咸豐年以前嘅舊事，令我心情非常鬱悶，而我又唔想一連兩晚對住我嘅八婆好朋友Bella，於是我收工之後一個人去咗睇戲。
入到戲院，其實套戲講咩唔係重點。只要拍得中規中矩，隨便個故事講得通，我就可以用晒自己嘅想像力投入去角色度，暫時逃避一下現實。
本質上，一個人睇戲同自慰都幾類似。
明知所有感受都係假嘅，但mood到或者投入到，咪諗辦法令自己變得不一樣，對唔同人做對手戲又得，將過程美化200%又得。總之，就係喺起承轉合途中，搵一個爽快嘅高潮。之後，無論係留下餘韻，定係痛快淋漓，都只係一段心甘情願嘅自欺過程。
但兩件事同樣令人最掃興嘅，永遠都係半路中途 電！話！響！而且，仲要接通同傾埋電話添。
「先生，麻煩要講電話就出去講！」終於，坐喺我前幾行嘅一個男人，忍唔住出聲。
唔知由幾時開始，多數人都只係敢怒不敢言。雖然只係小事，但對於敢言嘅人，我特別欣賞。因為佢哋先有資格去令世界進步，哪怕只係一丁點改變。
不過，令我估唔到嘅係，原來發聲嗰個係 Vincent。我暗暗記住佢坐邊個位置，黑暗之中的屏幕光影令佢嘅背影顯得特別charm。
「咁啱呀？」完場後，我立即追上佢。
「Purple姐？妳一個呀？」Vincent驚訝咁問。
「好奇咩？你都一個人睇戲啦！」
「嗯⋯⋯」Vincent欲言又止，似乎仍然好介意今日喺公司嘅事。
「有無約人？無，就請你食飯。」我希望主動突破缺口。
「做咩要請我食飯呀？」
有時，我會為年輕人嘅率直感到尷尬，但同時亦好羨慕佢哋唔太用腦嘅自在。唔通你會expect 一個上司喺放工時間，仲會為咗工事而同你講對唔住咩！
「多謝你頭先令我可以繼續專心睇戲。」
我哋去咗戲院同一個商場嘅一間中菜館食飯。幾年前開始，中式晚餐成為咗我嘅常規選項之一。三十歲之前，我嘅晚飯總會配酒或者凍飲，沖走一日嘅疲累。三十歲之後，我慢慢發現一口熱茶流過喉嚨之後，胸腔嘅暖意反而更舒坦。
由於係平日嘅關係，全場只係得三兩枱客人。老闆可能會錯意，因為我之前同歐生嚟過，於是同樣安排咗間房比我，話俾我哋放心傾偈喎。或者，老闆係怕我哋會騷擾到其他客人。因為上一次我同歐生應該刷新咗新嘅破壞指數，除咗打爛唔少碗碟之外，圓枱上面嘅枱布同窗簾都俾我扯爛埋。
「你連呢啲舊戲都有睇？」我估唔到Vincent 除咗同我一樣會一個人入戲院之外，佢仲會睇返啲經典電影。
「我更加估唔到平日做嘢咁嚴格嘅Purple姐，原來都鍾意睇輕鬆小品啦！」傾到共同興趣，Vincent 似乎已經忘記咗今朝嘅事，令成餐飯嘅氣氛輕鬆好多。
「返工一個樣，收工另一個樣，咁先係真正嘅work life balance 嘛。」
「咁又係。唔通我鍾意動畫，又會著公仔tee 返工咩。不過，我放假真係會著，仲成個衣櫃都係添。」
「咁低能？咁真係睇你唔出喎。」
「興趣嚟咋。睇咩先唔叫低能先？」
「男人唔係都最鍾意睇AV 咩？」
「鍾意睇果個階段，已經過晒啦！男人應該係初中左右，仲對嗰方面非常好奇嘅時候先會好熱衷睇AV㗎。」
「我就唔信你而家無睇。」
「無呀！」
「唔駛怕醜喎。睇都好正常啫。」
「好少。」
「即係有啦！」我突然興起，就問：「點解唔正正經經識個女朋友呢？有真人，咪唔駛睇2D畫面囉。」
「AV有咗3D版本好幾年啦！而家已經有埋3DVR添啦！」
「咁得意？但咪又係同咁上下內容。」
「唔同。」Vincent條件反射咁表示反對：「好多不同劇情㗎！」
「咁你對上睇果套又有咩劇情呀？」
「扮True man show，男下屬同女……」
Vincent 突然收口，我大概已經知道佢所指嘅係咩。如果就咁停咗個話題，可能之後仲尷尬，所以唯有我主動延續個話題落去。
「男下屬同女上司嗎？」我裝作毫不在乎：「權力倒置，既可以令在下位者消除自卑，又可以俾高位者因羞恥心而引起快感。既係性，又係思想上嘅暴力顯示。」
「俾妳講到咁學術，攪到我對呢個題材無晒興趣啦！哈哈！」
「講返轉頭，咁點解唔拍拖呢？你條件都算唔差。」
「一來係口味問題，二來係無信心。」
「咩口味？」
「我好似啱啱講完咋喎。」
喺前兩分鐘，我仲對Vincent嘅率直產生好感。但呢一刻，我懷疑佢係有意引導我去呢個陷阱。我可能低估咗眼前呢個細我十年以上嘅男人，佢已經超越flirting，而且仲帶有侵略性。
「你最好小心啲，而家好容易metoo㗎。」我嘗試挑戰Vincent，以測試佢係有心定無意。
「不過，話題好似係妳帶起先㗎喎。」Vincent 不甘示弱嘅態度，已經證明咗佢別有用心。
當我正煩惱唔知點handle呢段已經接近告白嘅關係時，我收到一個令我意外得大腦發麻嘅message，係歐生：「Sorry！我要結婚。」
（待續）
柏原太賀Facebook：
