警告
習慣單身嘅好處係，當妳遇到任何hard time，妳都只可以依靠自己。調整心情就好似家常便飯一樣，甚至強迫自己連M痛都唔好俾人發現妳臉青。
「妳真係無事？」Bella 已經連續問咗成個星期。
「無呀！咪講咗囉。」我不厭其煩咁又再答佢，畢竟我覺得佢係出自關心。
「唔好屈住喎。我係妳嘅話，一定hurt爆。」
「如果妳覺得我真係有啲hurt，會唔會考慮下咪成日提住呢？」
「唔得。一定要發洩出嚟㗎！」Bella好似執到寶咁講：「嚟緊個星期六有bazaar sale，不如我哋一齊⋯⋯」
「食蕉啦！妳！」
我扮晒溫柔咁講完句「食蕉」之後，就立即cut佢線。仲等我有一刻錯覺友誼嘅可貴，原來佢只係想搵個人陪佢一齊去shopping。從小，我就唔係去廁所都要一齊嘅女生；大咗，我更加唔係一哭二鬧三上吊時，仲可以講幾個鐘「點解佢唔愛我」之後都仲未斷氣嘅女人。
就喺我用緊大腦嘅極限，兼顧工作同自癒之際，Vincent 敲門入嚟講：「Purple姐，差唔多七點啦！」
「係咩？我都唔覺。你有事嘅話，可以走先，畢竟係Happy Friday。」我隨意咁講。
「嗯。不過，我今晚又打算去睇戲。唔知妳得唔得閒呢？」
「你date我呀？」
「係。」Vincent答得好有信心。
「Great！有信心先似個男人。希望你落site開會果時，都一樣咁令人feel comfort。」
「Feel comfort？」
「即係令人覺得可以信賴。」我turn off咗部電腦後，企喺身講：「行啦！」
如果自癒遇上困難，用少少工具去幫自己，我諗就算上帝都唔會責怪。
我以為Vincent呢類年輕男仔，一定會睇英雄電影，點知佢揀咗套愛情片睇。對於愛情故事，我知道大部份都係編劇刻意美化嘅效果，理應唔會再被感動。但係偏偏因為我平日生活撐得太盡，好容易就會投入到。簡單啲，就係太眼淺。
所以，睇完戲之後，Vincent 帶我去附近嘅公園散步，避免俾人見到我眼紅紅。同時，佢不停咁向我講對唔住。
「放心！我無事喎。」我安慰返佢轉頭：「你最好盡快忘記我個貓樣添呀！」
「好難忘。平日見到嘅Purple，都係好硬淨。」
「咁肉酸。」
「唔係呀！無咩女人流眼淚嘅時候，好似妳咁性感。」
「又亂講嘢。」
「我講真㗎。」
我輕敲佢頭頂一下，當然只係打算教訓佢嘅口花。就喺我洋洋得意，預備見到佢唔知閃唔閃避嘅尷尬樣嘅時候，佢竟然好誇張咁叫咗出嚟。之後，仲向前面仆低咗。
我上前想扶佢起身，但一種危險感令我本能反應擰返轉頭，竟然見到揸住一把刀仔嘅Chris。
「就係你搶人老婆！」Chris向地下嘅Vincent大叫。
「你痴線㗎！」我望一望Vincent，佢背脊流緊血，不過應該唔算嚴重。
「我認得佢。上次就係佢喺妳屋企出現。」
「佢係我同事嚟㗎！」
「揸得妳車，上埋樓，即係床都上埋啦！妳做咩要咁作賤自己，用佢嚟激我！」
「我同你離咗婚㗎啦！你再唔走，我立即報警。」
「佢俾綠帽我戴，我今日就嚟隊佢。」
Chris衝向我哋嘅時候，Vincent立即擋喺我面前。幾乎喺Chris把刀仔刺向佢嘅同一時間，Vincent用一下過肩摔將Chris壓落地下。
「我唔理你係Purple邊個，總之有我喺度，你唔駛旨意傷害佢。」
一陣感動湧上心頭，而且仲覺得眼前嘅Vincent唔再係一個細路，幾man添。果然，英雄救美係既老土，又萬試萬靈嘅冧女絕招。
警察趕來後，Chris被警員帶走。Vincent說自己只是皮外傷，本來我們想就此作罷，但因為Chris持刀傷人，就只好先俾Vincent去醫院，而我就去差館落口供。當我落完口供之後，Vincent已經喺差館等我。
「你無事嘛？唔駛過嚟搵我，早啲返屋企休息啦！」我勸Vincent嘅時候，內心充滿歉疚。畢竟Chris呢個瘟神係衝住我而嚟。
「我就無事⋯⋯不過，我要當面同妳攞日假，因為頭先一跌，我個電話爛咗。我阿頭如果見我聽日無故失蹤，我怕會俾佢炒呀！」見Vincent仲識開玩笑，我安落咗少少。
「我似咁不近人情咩？」
「如果唔係，係唔係應該照顧下救命恩人，比我上妳屋企休息下呢？」
「嗱！你想點先？」
「我同屋企人一齊住。如果俾佢哋見到我成件衫都係血跡，怕佢哋擔心。」
「即係要比你上我屋企沖涼換衫啦！妳知我屋企有男裝衫咩？」
「我都幾fit呀！如果妳有over size衫，我都應該啱著。」
呢個藉口都算係爛得可憐。不過，我坦白當時第一時間諗到嘅係，如果佢有任何行動，我未必會抗拒。
「我如果拒絕一個救命恩人嘅要求，我咪變得好冷血？」
「係㗎。」
「咁行啦！」
然而，我並無諗過原來我嘅一舉一動，都已經喺某人嘅怨恨目光之下。
（待續）
柏原太賀Facebook：
