警告
當見到歐生嘅message嘅時候，我不停同自己講：
Purple，呢一日妳早就預咗㗎啦！妳哋兩個只係為咗需要一齊，半滴愛情都無。所以，妳要做出rehearsal咗一百次嘅反應，大方祝福佢。無錯！唔通妳以為自己成世做人第三者咩？人哋唔悶，妳自己都悶啦！外面大把世界，正嘅男人多到不得了，只要妳拉低少少個領，揀到妳唔揀，嘆到妳唔嘆啦！妳而家做咩啫！做咩啫！⋯⋯
「Purple姐，Purple姐！」當我回神嘅時候，Vincent已經唔知叫咗我幾多次。
「嗯。無事。」虛脫嘅感覺，並無因為重返現實而消退。
「妳真係無事？」Vincent 欲言又止：「Purple姐，妳眼角……」
我連忙用手輕擦眼角，好驚訝咁手指頭竟然有啲濕潤。
「老問題嚟。一眼乾就會唔舒服到唔想講嘢，直到流出少少眼水為止。」我為自己嘅失態搵藉口，反而顯得更笨拙。」
「莫非⋯⋯妳頭先係合埋口打喊露？」
「吓？」
「我成日都係咁㗎。想打喊露又唔想比人知，但唔打出嚟又唔舒服，咪合埋口打囉。打完之後，仲會流眼水添。」Vincent 竟然強行解釋我嘅眼淚，完全係我意料之外。
「哈哈！」我為呢份用心，忍唔住笑出嚟：「竟然俾你識穿咗。不過，放心！我唔係覺得妳悶，只係有啲攰啫。」
「我一啲都無擔心過自己會悶親人。」
「自信係一份好事。對男人嚟講……」
「唔當我係男仔咩？」
「Kindness turn a boy into a gentleman.」
雖然外表已經平靜，但我內心的確翻滾得好厲害。我有一絲衝動諗過是旦同一個男人上床，去驅散壓得我就快透唔到氣嘅鬱悶，即使係眼前嘅Vincent 亦無所謂。不過，我身體反應話我知，我完全無心情去做愛，係down到連除衫都覺得無力嗰隻。
「我返屋企先。」埋單後，我仍然被逃亡嘅心情纏繞。
「我送妳吖。」Vincent 好意問。
「唔駛。我有車。」我雖然無意hurt佢，但就衝口而出。所以，最後只可以補返一個微笑。
我漫無目的咁揸住架車，先上東廊，再過海，最後喺無人嘅觀塘海濱停低。我離開車廂，搵到一間便利店，買咗包煙。
我有個壞習慣，每次結束一段感情嘅時候，都會買包煙，食晒為止，食晒就算。不過，今次我好唔想打開個包裝。我反覆望個電話屏幕，期望喺一句短短嘅message，尋找根本唔存在嘅隱情。
「喂！我呀。」不知不覺間，我手指頭好似有自主思維咁打比歐生。
「我知道。」歐生同我透過電話互相交換寧靜嘅背景，默不作聲咗一段好長嘅時間。
「你有無嘢想同我講？」
「對唔住。」
「為咩？你覺得有嘢對我唔住咩？」
「我諗我哋嘅旅行要cancel……」
「幾時決定結婚？」
「尋日。」
「原因呢？你唔似係可以俾人逼婚嘅人。」
「佢有咗，三個月。」
「原來係雙喜臨門，恭喜！」我撕開煙包嘅透明包裝膠，抽出一支後講：「我有嘢做，bye！」
可能係收線收得太急，歐生打過好幾次嚟，但我都無聽。最後一次，我仲刻意cut佢線。
「我唔係有心令妳feel uncomfortable，但妳有權知呢件事。Sorry！」歐生轉用whatsapp傳message比我。
「我完全唔明你想講咩！我係咩身份，我自己知。」我回覆。
「我希望妳唔好太upset。妳永遠都係我嘅soulmate。」
見到歐生嘅message，我突然好似睇清楚某啲嘢；我見到佢一直遮掩住嘅虛偽，終於浮出水面而感到好嘔心。
「我唔通要大大方方咁話替你高興嗎？」我傳完之後，見到佢「輸入中…」。不過，佢被我搶先一步：「如果我哋一齊都未搞過嘢的話，我哋都仲可以叫soulmate。但係我哋上過床之後，你講嘅每句說話，做嘅每個動作，都係為咗keep住可以一次又一次同我上床。」
「妳唔好咁激動，好唔好？」歐生呀！如果你真係覺得我激動得有危險，點解唔立即拋低所有嘢，出嚟搵我？而係隔住個電話，打幾個字就妄想可以令我平伏呢？
「你呃我！」
「我哋由始至終都係open relationship。妳知我status㗎。」
「當我哋仲未上床，當我哋真係仲有機會成為soulmate 嘅時候，係你話佢同咗你一齊十幾年，對佢有情有義，但無愛！」
「So？我無瞞妳，事實係咁。」
「事實係你講大話！你同佢無感情，又點會做愛？點會有咗三個月呀！你唔係同佢無感情，反而係感情氾濫。你只係一個貪婪嘅人，希望同一時間享受兩個女人帶比你嘅快感。」
「我同佢只係例行公事，對妳先係真感情。」
「麻煩你俾返最起碼嘅尊重，唔好當我係未成年嘅妹妹仔。真假，我仲識分！」
「唔可以好嚟好去咩？」
「Goodbye！」我打完都覺得自己太假，所以未send 就改返：「If you're nice to me, I'm nice to you. But you're a fucking liar!」
傳完之後，我連電話都熄埋，唔想再浪費任何一秒嘅時間喺呢個男人身上。我只想專心感受尼古丁暫時麻醉大腦嘅無力感，同埋讓焦油微焯已經被撕裂心肺嘅痛。
（待續）
柏原太賀Facebook：
