我望着微光照射在轉動中的食物，從冷冰到熱得冒出蒸氣，需要的時間比烹調短得多。雖然明知那件炸鱈魚不可跟現炸的媲美，但在講求速度的 lunch hour，誰會在意呢？而且，即使買外賣的，也可能只是翻熱的隔夜食材。
整整一星期，為了減少感染的機會，大部份同事在午飯時間不是帶飯，就是叫外賣回公司。因此，我跟身旁的她由朋友變成閨密，總在午飯時談到她的近況。
「竟然係鱈魚，真係花心機喎。」她望着我的餐盒說。
「妳尋晚又約咗個男人呀？」我問。
「咁妳都知？」她答得毫不驚訝，就像尋常不過的細節被注意到般。
「妳今日件外套係尋日果件，不過多咗煙味。妳同 Kelvin 又唔食嘅。」
Kelvin 是她名正言順的男朋友，也是我們的同事。不過，我倆跟他卻在不同部門，所以不在同一樓層。
「係呀！最近連飯都冇得出街食，索性幫襯個酒店 package，上房叫 room service 食，食完可以即刻搞埋。」
「佢唔駛交人咩？」
「梗係要啦！佢老婆打咗幾次嚟催佢返屋企，以為佢仲喺公司 OT。」
「妳唔嬲咩？」
「我寧願佢快啲走，專登郁多啲，佢早啲完事算數，反正佢都專心唔到。一邊搞，一邊睇住有冇電話搵佢。」
「咁有咩意思呀？」
「之前，我想要嘅時候，佢餵我；而家，佢想要的話，咪我餵番佢囉。各取所需之餘，又唔可以太自私。」
「『唔自私』出喺妳把口，都幾諷刺喎！」
我以為這只是尋常的調侃，卻想不到換來一句認真的回應。
「佢話⋯⋯佢已經同老婆傾緊離婚。」
「吓？」我不禁以為自己聽錯：「妳認真咩？幾時沉咗㗎？」
「唔知呀！當我發現佢老婆打嚟嘅時候，我竟然專登令佢覺得我唔在意，我就知道其實我在意。」
「但係⋯⋯妳信？」
「我只係知道當一個男人同時拖住兩個女人，又已經瞞唔到嘅時候，佢煩到寧願自己消失於呢個世界上。所以，我由得佢老婆不斷打嚟煩佢，而我就做一個順佢意嘅女人。」
「佢老婆知妳哋嘅事？」
「我諗傻嘅都估到啦！唔係，又點會狂打電話俾佢呀？呢個時勢都仲 OT，妳都唔信啦！」
「咁 Kelvin 呢？」
「如果佢真係同老婆離婚，我就會同 Kelvin 分手。」
這個時候，我們的視線同時望向推門而來的 Kelvin。他望向我們，先禮貌地跟我一笑後，再親切地走向她。
「Sorry! 尋晚阿爸同阿媽嘈到癲，送唔到妳返屋企，仲煩到冇時間打俾妳。」
「唔緊要，你都 message 咗我。同埋，我都好早瞓咗喇！」
「嗯。不過，我哋個 system 啱啱又出問題，可能呢期太多人用我哋 online service，今晚要整好先走得。」
「咁都冇辦法啦！不過，就算你收得工，我哋都冇地方去啦！所以，慢慢做啦！」
「Ok! 咁今晚我走，再打俾妳，love you!」
看着 Kelvin 的背影，我不禁問：「妳真係捨得？」
******
在熟悉的房間內，我坐在唯一的書桌前，把剛剛吃剩一大塊的鱈魚放進食物盒，還裝模作樣地用配菜包圍，看起來像是精心炮製。
空氣中，室內乾燥感、飯菜的餘香及獨有的清新劑取得平衡，忽然因浴室門被打開而破壞。濕潤的蒸氣及濃烈的洗髮乳襲來，從後將我包圍，再肆意從耳背滑落到頸，一直挑逗我的情緒。
「等等。我收起個飯盒先啦！」
「反正聽日食，都凍晒。不如而家食啲熱嘅嘢先。」
我轉動椅子，與站着的他相對，熾熱的慾望正好對着仍略帶調味芡汁的嘴唇。我以熟練的動作回敬他的心意作為頭盤，不消片刻，他便將我整個抱起，再放到純白的床上，完成當晚的主菜。
慾望的盛宴過後，我點起煙。他卻不經意地望向掛在旁邊的西裝外套。
「你怕佢聽日聞到咩？」
「唔係呀！」他看來對這個話題有點顧忌，連忙盤開話題：「點解兩晚都嚟呢間呀？」
「我鍾意呢度嘅鱈魚。食唔晒，聽日當飯盒。佢見到，蠢到以為我自己整。」
「妳好想贏佢咩？」
我想起今日跟她的對話，男人在面對選擇時，會煩得寧可自己消失。
「唔想，我淨係想同你嘅相處舒服就夠，唔想諗大家咩關係。」
「我會覺得對妳哋兩個唔住。」
「我唔介意，佢亦都唔會知道。不過，萬一佢同你分手的話，你會唔會同我一齊呀？」
「會。」
我從床上起身，蓋上食物盒的蓋子。或許，她今晚也跟偷情的對象 order 同一款式的套餐，明天便會發現這塊熟口熟面的鱈魚，還有 Kelvin 身上另一種淡淡的煙味。
~~完~~
重溫：
偷愛的上集故事（一集完）
柏原太賀 facebook：
