不少人以為直覺是沒有準確，只有對錯，因為他們誤把直覺視為賭博式的估計。可是，真正信賴直覺的人，卻明白它是過往經驗的累積及歸納。科學一點來說，直覺就是未有證據的假設。
上午，賴雅汶跟郭嘉宜掛線後，她的心一直無法安定，卻沒有不安。她好奇，那個不請自來的Davis 到底是什麼人，還平白為她受了木板的痛擊呢？而且，他說今天會找她的。既然對方如此神通廣大，倒不如靜靜讓事情發展下去。反正，這段日子，她已經被前度折磨得快精神衰弱。
六點，她開始為是否離開辦公室而躊躇。
「賠番畀妳嘅。」
賴雅汶離開辦公室，甫一走出升降機大堂，便見到拿着一個新電話的Davis。她接過後，不禁安慰地笑了。電話是最新型號，就是她早就在電訊商登記了，前幾天才剛剛拿貨的。
「買呢部新機，你係排隊，定食炒價呀？」
「唔難買吖。」
「除咗用咩電話之外，你似乎知道我唔少嘢喎。」
「妳咁問，應該發現咗我其實唔係妳朋友嘅friend。」
「嗯。我仲發現我哋可能一齊喺同一幢大廈返工。否則，就算你知道我啱啱收工，你都冇可能快過我落到嚟。如果你一直喺大堂等的話，呢度嘅保安會對外來人問長問短，之後就會請你離開。」
「分析得唔錯。不過，唔怕我係 stalker 咩？」
「有咁諗過，但係 stalker 唔會咁明目張膽出現，更加唔會為我擋咗一下。所以，我直覺你唔係壞人。」
「佢以為我係妳移情別戀的對像，目標係我，所以我先賠番個電話畀妳。」
「咁我就唔講多謝啦！但係，你點解知道我要人接，又知我個名？」
Davis沒有直接答話，反而問：「今晚送妳返屋企前，賞臉食餐飯嗎？」
******
賴雅汶有一刻擔心Davis會帶去奇怪地方，但他倒是正正經經地開車到對面海的餐廳。餐廳內，原來落地玻璃的設計讓食客可欣賞維港夜景，但她們卻好像望着剛剛才離開的大廈。
「好喇！嘢食都嚟齊，係唔係可以邊食，邊話我知你係咩人呢？」
「正如妳所講，同一大廈返工嘅人。」
「成幢大廈幾百人返工，你點知我尋晚要人車返屋企呢？」
「妳當我兼職Uber 司機，尋晚我載錯客，sorry喎！」
「係？又咁啱個客同我一樣係賴，所以你第一時間問我係唔係賴小姐，咁就誤會咗喇。」
Davis 聳聳肩，點點頭，像是說「咪就係咁囉」。然而，賴雅汶當然不收貨，用叉子指指他，厲厲眼，又像在說「好快啲講啦」！
「妳唔怕尷尬，我就講喇。真係可能會令妳好尷尬㗎喎！」
「我怕咩呀？」
「咁好。」Davis放下刀叉，煞有介事地望着她說：「我公司係個半月前先搬過嚟嘅。頭兩星期，我覺得新office都唔錯。但大約一個月前，奇怪嘅事情發生⋯⋯」
「奇怪嘅事？同我有關？唔好嚇我呀！」
「有關。」Davis語氣肯定，神色凝重，續說：「我想問，妳之前有冇發現身邊嘅磁場好似出咗問題？同人嘅關係變差。而且⋯⋯無緣無故，明明妳成日個電話都冇熄過，但就好似有個結界咁，有人話點都搵妳唔到，打唔到比妳，又message遲遲未收到？」
「係⋯⋯有啲⋯⋯唔通⋯⋯？」
「對唔住！」Davis別過了頭。「我唔想講落去喇！」
「講啦！咩事呀？你唔講，我仲驚啦！」
「咁係因為妳公司入面，有人做咗手腳⋯⋯」
「吓？」
賴雅汶緊張得要命，她仍未解決前度的糾纏，苦連公司內也有人對她不安份的話，她實在沒有餘力對抗。那一刻，她諷刺地想起曾經因衣着問題，而跟多疑的前度吵得上天。
「係咩人，對我做咗咩？」
「應該係妳上司或老闆？」
賴雅汶心裏有底。每次當她穿短裙上班的時候，他的某位上司總來稱讚她。
「咁我可以點呀？」
「轉。」
「轉工？而家咁嘅時勢，點轉工呀？」
「係轉台呀！」
「轉台？」
「妳個單位收唔到妳嘅電訊供應商網絡，我估妳一直要用公司WiFi。不過，似乎早兩星期，妳公司有人做咗『手腳』，改咗setting。於是，妳 detect 到，睇落連到線，但實際係用唔到公司WiFi。」
「竟然係咁！」賴雅汶似乎終於明白了什麼，卻差點忽略了最重要的問題：「但係關你咩事呢？」
「因為我公司有個好勁嘅WiFi冇lock，但一個月前，我發現有唔係我公司嘅人偷偷用咗。而呢個WiFi咁啱係我用嚟測試網絡安全，睇下透過一個programmed 咗嘅WiFi去截取最新iso嘅加密通訊。」
「即係妳睇晒我所有message呀？」
「嗯。我一時興起，就扮妳朋友去接妳。」
「問題係所有message，連delete咗嘅都睇到？」
「所以，我要同妳講對唔住。」
Davis的答案果然令賴雅汶尷尬得要命，不是因為她無意間盜用了其他人的WiFi，而是在過去一整個月，那個為了令她回心轉意而無所不用其極的前男友，多次傳了兩人熱戀時的床照給她。美其名叫她回憶往日的「甜蜜」，實際上卻帶有威脅之意。
賴雅汶低下頭，像個完全不懂說話的啞巴。她下意識地用力夾緊雙腿，卻明知半點意義也沒有。眼前這個男人，不單窺視了她的私隱，就連私處也早被他看過清楚。他認得平常的自己，或許還記得那張浸泡於淫慾的臉。
（待續）
上一集：
重溫：
柏原太賀 facebook：
