如果有一天，身邊認識的人一起隱瞞或欺騙自己的話，妳不是闖下彌天大禍，便是被深深的保護。
「妳係警察？」
賴雅汶望着眼前的 Kat。那精煉短髮下嚴肅的眼神，跟個多月前的搗蛋女孩比較，實在是判若兩人。
「妳意思係妳出事前一直都係警察？」
「賴小姐，首先我唔係 Kat。妳口中嘅 Kat，據我所知已經同狄家任何人冇晒聯絡。我係職責所在，喺妳面前扮演 Kat，令妳意識到自己有危險。」
「妳意思係 Davis 同妳夾埋嚟呃我？」
賴雅汶想要一個答案；一個可以令她更傷心，或帶來奇蹟的答案。
「雅汶，唔係佢哋兩個呃妳。係我哋所有人一齊呃妳。」Johnson 轉向白 Sir，續說：「都係由你講啦！古惑仔講嘅嘢，點都唔夠警察可信。」
「賴小姐，我希望妳明白，我哋一切部署都係為咗妳嘅安全，同埋某人嘅委託……」白 Sir 話未說完，已被賴雅汶截停：「等等先！某人即係邊個呀！」
「挑！真係愈講愈亂！自己睇啦！」
Johnson 粗魯地雙手捉緊賴雅汶的膊頭，把她整個人轉向 180 度。
賴雅汶來不及反應，也因眼前的景象而靜止了一切動作。停車場一角，有一輛跑車吸引了她的目光。但重點不在於那車的價值，而是那個倚着跑車的男人。他的微曲黑髮仍然整理得宜；雙眼皮下的眼神依舊銳利有神；暗淡的燈光還不能遮掩白膩得病態的膚色，一切彷如首次見面時一樣。
他是 Davis，仍活生生的 Davis。
他倆第一次見面時，他隨手扔了抽了一半的香煙。或許那是前半支，今晚他扔了後半支。但這一次，他比從前更囂張。因為他不必招手，她已經主動走過來。
「你未死？」賴雅汶忍住激動。她很怕原來只是一場夢，怕一激動便夢醒。
「對唔住。我一定要扮死，而最好嘅方法就係連妳都呃埋。」Davis 毫不掩飾地說：「妳係我唯一嘅弱點，因為妳係我唯一在乎嘅人。」
「點解？做咩要呃我？」終於，賴雅汶從思念的折磨中釋放出來，雙手緊緊地環抱 Davis。「我好掛住你呀！」
Davis 也把賴雅汶一擁入懷。失去的愛情是淒美的，但對當事人而言，淒美只是永遠的遺憾。反而，失而復得的愛情才更珍貴。誰在乎美不美呢？
「好喇！係時候上機啦！唔好要我難做。」白 Sir 不解風情，卻有必要。
「上機？去邊呀？」賴雅汶問。
「Davis 答應協助我哋警方，條件係佢同妳要喺外國用新嘅身份生活。」
「究竟發生咩事呀？」
白 Sir 向賴雅汶娓娓道出一切。
多年來，警方一直希望打擊狄氏這個香港其中一個最大社團。可是，從外部卻永遠無法入手。他們一直在等籠裏雞作反。但誰也沒想到那隻大雞竟是家主的兩個兒子！
首先，自從那次綁架事件後，Davis 本來就打算不再沾染偏門生意。但家主卻暗中利誘其公司會計，以 Davis 的科技公司一直進行境外洗錢工作。由於涉及的是加密貨幣的轉移，到 Davis 發現公司竟有明暗兩份完全不同的帳目時，他已經到了「水洗唔清」的地步。
「佢一直明示暗示想我返社團幫手，但其實暗中做我，令我洗濕個頭，冇辦法拒絕佢。」Davis 說。
「所以，我哋嘅目標係個會計。如果 Davis『在生』，佢就會將所有嘢都推晒畀 Davis。但如果 Davis 唔喺度，佢除非一個人攬晒，唔係就會將啲料爆出嚟。」白 Sir 接着解說。
於是，Davis 暗中找 Johnson 商量。這個被架空了的龍頭，一生最在乎然只有這個弟弟。而且，Wing 果然暗中色誘了家主。酒、色、財、氣圍繞大半生的家主，一向視男女關係如得閒，對飛來豔福更是卻之不恭。雖然 Johnson 早就心知肚明，本來也忍下來，反正他也不愛這個放蕩的女人。可是，一想到家主連半點親情也「唔畀面」，根本只視他倆兄弟如工具，便決定跟 Davis 聯手。
「我哋一早已經聯絡咗白 Sir。社團人士同警察之間一旦合作，效率同成效，絕對係外人難以置信。」 Johnson 哈哈大笑，白 Sir 在同袍面前免不了尷尬。
「咳咳！我哋都係為咗破案，先會格外……」白 Sir 本想解釋，卻又被 Johnson 停下。
「唔好扮嘢喇！我哋都係拜同一個關二哥㗎！」
「總之，Davis 公司嘅錢畀我哋『隱咗形』，加上佢一有意外，狄氏就以為係其他社團做嘢而去報復。 Johnson 再撩下個火頭之後，又失埋蹤，佢哋家主自然會親自做嘢。咁樣一來，我哋就會有證據。」
「即係成件事，係警察同社團夾埋做一場戲，設個局去引人犯法？」賴雅汶本來難以接受這樣的發展。然而，她記起不少新聞，其實大家早就明白現實並不如電視劇般乾淨。
「妳可以咁諗，如果佢唔打算犯法，我哋做咩都冇用。」白 Sir 也因為自己牽強的解釋而面有難色。「Johnson 會喺一陣畀我哋『拘捕』，之後會成為污點證人。」
「知啦！坐過一次，都唔差在坐多次。」Johnson 不以為意。
「我哋會同個官求情，好快你就會出返嚟。」
雖然賴雅汶還未理清如此複雜的利害關係，但她想到一件更在意的事。
「咁你呢？你會點呀？」她緊張地問 Davis。
「頭先白 Sir 已經講咗，我哋會喺外國用新嘅身份生活，而且我嘅現金資產已經轉移咗去海外。一切，都係交易。」
「交易？」
「妳忘記咗我哋點識嗎？呢個開發系統喺竊取過程中，完全唔會留低任何痕跡。個核心 coding，我哋去到外國之後，就會交畀呢位 madam。佢哋部門，好需要呢樣嘢。」Davis 冷眼地望向那位假裝 Kat 的警員。
「我勸你唔好講太多無謂嘢。」不知名 madam 的氣焰明顯比在場任何一人也強得多。「我哋只係避免麻煩嘅司法程序，唔想放生擾亂治安嘅頭目，所以先對你寬大處理。」
「寬大處理？妳唔係幫我，係怕我中途改變主意啫。而且，我真係有犯法咩？」
「法治之下，一日未判，可以無，又可以有。」
明明是策劃一切的主謀，甚至親身落場做大戲，卻理直氣壯地說大義，講道理。不是「球證、旁證、足協、足總、足委，全部都係我的人」般有恃無恐，還可以是什麼呢？但當自己及真正着緊的個人安全受到威脅時，「義」及「理」有時只會相對地渺小得很。是否情有可原，只好見「人」見智。
「上機啦！唔好再講。」白 Sir 見氣氛轉差，不想節外生枝，連忙把機票及護照遞給 Davis，並向他耳語：「呢種地方，走咗就唔好返嚟。」
「心照。」
「保重。」
******
Davis 及賴雅汶沒有經過客運大樓，反而從物流那邊直接進入禁區。在登上飛機前，他倆說話不多，卻一直緊握着對方的手。直到起飛後，她倆才鬆一口氣。
「係喎！」突然，賴雅汶想起了身邊的人。「你係發現咗郭家宜跟蹤你，所以先呃我㗎？」
「佢？哈哈！唔畀人發現嘅先叫跟蹤，佢呢種叫吊靴鬼咋！」Davis 一臉得意，續說：「錯有錯着啦！反正唔知點向妳解釋，咁就索性完咗件事先同妳講。」
「你唔怕我嬲死你？唔畀我以為你死咗，好傷心咁是旦搵個男人填補㗎？」
「See！事實勝於雄辯。」
Davis 旁若無人地對她深深一吻。事實往往於雄辯中找出來，不敵的卻是深情。
「等等！咁我點同屋企人交代呀？」
「嗯。放心！我最後一次用個系統就係 hack 去妳電話，同妳屋企人講咗呢兩幾日要緊急陪老細出 trip 啦！」
「陪老細？搞錯呀！佢哋實亂諗啦！」
「到埗先再慢慢交代啦！我會接埋佢哋過嚟㗎啦！」
「你……你咩身份接佢哋呀？」
「按我要求，我哋係新身份係夫婦嚟。」
「你都好夾硬嚟喎！」
「如果咁呢？」
Davis 把一隻設計簡樸的戒指從口袋裏拿出來，並套在賴雅汶的無名指上。
「雖然冇咗個 system，但由今日開始，我會全天候人肉守護妳。妳願意嗎？」
萬呎高空上，她回應：「我願意。」
~~~全故完~~~
重溫：
柏原太賀 facebook：
https://www.facebook.com/Kashiwabara30
===========================
💕she.com X LELO送禮 💋
而家回答一條簡單問題，答得最有心思🌟有機會得到大受歡迎的LELO SILA™️ 及LELO SONA™️ 2外，奢華情趣用品套裝更包括HEX™️安全套、情趣束帶、按摩蠟燭(禮品總價值超過$4,000 |名額2位)
