Johnson 異常冷靜，默默為 Davis 鬆開被綁的雙手，卻對阿 Wing 不屑一顧。
「你頭先見到啲咩？」打破沉默的，自然只有足夠份量的 Johnson。
Johnson 厲著剛才負責拍片的男人，空氣一下子凝結。男人只知道情況惡劣得很，要是外頭沒有意外的話，狄家大少又怎會如此大搖大擺地走進來呢？他很想發問；想知道兄弟們到底怎樣了；但更想了解的，是自己的處境。
行走江湖，一句錯誤的說話便代表一個答案；一個足以要命的決定。
「我……頭先畀狄二少打暈咗，啱啱……先有人踢番醒。」
「非常好。用你條命嚟記住自己頭先講過啲咩！」
Johnson 放下戒備，本打算讓那個男人離開，但那個江湖經驗不足的小混混卻犯了一個最不應該的錯誤；膽怯了。明明跟門口只有短短幾步，他卻偏偏在經過 Johnson 身旁時，怕得想盡快衝出去。凶險時最忌大動作，因為只會挑起其他人的神經，特別是剛剛還在屈辱中的 Davis。
「哥，小心！」
Davis 以為男人發難，以身體把男人壓在牆上，更一手奪了 Johnson 的槍。至於 Johnson 也瞬間作出反應，二話不說掩着男人的嘴，避免他叫出聲。如此混亂之際，Davis 竟能立即會意，沒有開槍，反手用槍托瘋狂地敲打男人的頭。兄弟倆的默契盡在不言中，換來一場血漿四濺的爆頭式行刑。
Johnson 望着倒在血泊之中，動也不動的男人，心想「出事了」。反而一直冷眼旁觀的阿 Wing，卻仍懂得整理好衣服。至於好不容易才停下來的 Davis，氣呼呼的吐出半個字。
「哥？」
「冇事咧！」
「外面班仆街呢？」
「外面冇外人，只有自己兄弟。」Johnson 說了一句完全超出 Davis 理解的說話後，續說：「一個鐘頭前，Daddy 叫我同佢哋大佬傾好咗，以後佢哋會係狄氏一個新堂口。只係呢度荒山野嶺，佢哋收唔到電話，所以……我嚟遲咗。」
挺而走險的人，不求財，難道求氣麼？對小混混而言，與其跟難以匹敵的人作對，不如依附他去當隻寄生蟲；對狄氏而言，與其花時間去解決雞毛蒜皮的麻煩，不如吸納阻手阻腳的人來當另一隻手腳。家主的出手，不在蠻力，卻比蠻力更有力量；更無可挑剔。
「但係件事……」Davis 瞄了阿 Wing 一眼。「件事傳出去，我哋……社團以後仲點立足？」
「你以為 Daddy 會叫我空手去同佢哋傾咩？多得你套新 system，佢哋每個人嘅家爺仔乸資料，都已經喺我哋手。有邊個唔封口，就全部人一齊連坐。」
「包括我嗎？」阿 Wing 突然望向兩人問。
「嘿！」Johnson 冷笑。「放心！只要妳由呢刻開始安安份份，妳今日受咗幾多，有我一日都唔會辜負妳。」
Johnson 着 Davis 及阿 Wing 先走，卻說要自己留下來善後。一而再，再而三地犯錯的 Davis，自然沒有想太多。可是，當他再次見到 Johnson 時，卻已是隔着玻璃在探監。
「點解唔係我？」
「你有前途，有學歷，冇必要留個案底。聽我講，今次已經證明你唔係行呢條路嘅人。」
「我知喇！」Davis 已經沒有爭辯的餘地。「但係搵個兄弟，畀足安家佢頂咪得囉！」
「我哋呢頭啱啱向佢哋招安，果頭就打到人哋殘廢，點都要比個交代人。而且，衰自衛傷人坐三兩年就出得返嚟啦！」
「我點都要為你做返啲嘢。如果唔係，我真係冇面再見你。」
「傻仔！你似乎仲未明白發生咗咩事。哈哈哈哈！」Johnson 倒是笑得開懷。「你以為你對我唔住呀？我都幾肯定係阿 Wing 主動引你，你先會肯做，啱嗎？你記唔記得 Daddy 成日講，呢個世界冇鬼，係死唔到人㗎！」
「你係話成件事……」Davis 震驚得難以置信。
「唔係成件事。」Johnson 頓了一頓，續說：「班友想打我哋地盤主意係堅嘅，只係有人順水推舟啫。點解咁啱會一次過捉晒我哋兩條女？又點解最後會變成咁？」
「阿 Wing 畀我……佢有咩着數呀？」
「要一個普通人消失容易，要一個明星仔人間蒸發就難好多。佢咁樣，我哋兩兄弟表面上成世欠佢之餘，而且仲要諗辦法安撫佢，令佢唔好揚出去。最有效嘅方法，就係令佢成為自己人。」
「咩話！」Davis 差點激動得站起來。「一個咁嘅女人，點可以畀佢入我哋狄家。」
「你唔覺得呢種咁不擇手段女人，先配做成個社團嘅大嫂咩？」
「總之，我唔會認同。」
「但係 Daddy 唔係咁諗。」
「吓？」
「Daddy 似乎好賞識佢，話無論如何，都要留住呢個女人。你就畀我做番次孝順仔啦！」
家醜縱使沒有外傳，但一個家之內，有一個令自己抬不起頭的大哥，一個不知羞恥的大嫂，還有一個歪曲是非的父親，已有充分理由叫 Davis 不想再踏足家門半步。
「哥，咁太難為你啦！」
「哈哈！點會呀！阿 Wing 又索又淫，正到爆啦！同埋，呢種女人，只要達到佢嘅目的，根本唔會管我喺外面搞咩，我都不知幾期待出返嚟之後嘅精彩生活。」
「你出嚟之前，想我幫你做啲咩？」
「你好好照顧自己就得。同埋，答應我一件事……」
******
賴雅汶完全沒想過，Davis 口中的危險，竟然遠超自己的想像。同時，她似乎對自己為何被 Davis 看上，終於有點頭緒。
（待續）
重溫：
柏原太賀 facebook：
