游凱玲三扒兩撥就已經從洞底跳了出來，輕鬆程度就連她也感到驚訝。
「如果陰間有奧運會的話，個紀錄都應該幾誇張。」游凱玲打趣說。
「據我所知，陰間係無呢種遊戲。凡人先會咁在意競爭，而一生鬥生鬥死嘅萬物，到死後只有一個目的，就係盡快安息。」我隨口回應。
「如果你唔講，我仲以為你死過好多次添，咁有經驗嘅？」
我不欲理會這個無聊的玩笑，希望盡快重回主題。
「妳點知自己係跌死？而唔係因乜乜不遂而推妳落去呢？」
「你先無睇清楚我條屍咩？啲衫褲全部都仲好整齊㗎！」
我往下再望清楚，跟她平常在 IG 的相片比較，絕對稱得上保守；以一具荒野死屍而言，卻整齊得帶點可疑。
「妳話自己係跌死嘅，但係妳之前明明話自己唔記得點死㗎喎。」我向她投以懷疑的目光。
「咁我可能太驚……太突然呢？」游凱玲結結巴巴地回應。
「就算係。當妳跌落去個窿嗰時，都無理由一粒聲都唔出啩。咁都無嘈醒人？」
「可能佢太眼瞓，瞓得冧呢？」
「好明顯！妳有嘢隱瞞！」
「無呀！」
「一定有。我呢個二流小說家，雖然專寫三流小說，但係點都無可能傻到睇唔出妳有嘢隱瞞嘅！」
「我……我……」
「唔通係妳……」我嘗試憑看過的數百本推理小說中，找出一個較普遍的套路。「係妳殺人不遂，結果比佢一個反身誤殺，係唔係？」
「我點會無端端殺人呀！」
「咁妳就講發生咩事啦！」
「唔講！唔講！我死都唔講！」
「所以妳咪死鬼咗囉！」
游凱玲突然靜下來，一臉不忿。說實在的，我才自覺剛剛有點過份，但老毛病就是不願意道歉；非常不願意！於是，我打算稍稍偏離原來話題。
「不過，通常一個枉死嘅人，知道自己死因之後；又或者已經了結自己生前心願的話，應該可以安息轉生。但係妳……」
「我無殺人。我只係夢遊。」
「吓？夢遊？」天呀！誰會想到這個……死因！
「係呀！而家夢遊跌死咗，唔得咩！」
「得~~ 咁妳頭先就唔駛吞吞吐吐啦！」
「吖嘛！」
「都唔係啫！對於妳嘅不幸呢，我深表……遺憾。」
我必須承認那一刻，我正極力咬著下唇忍笑。
「咁即係話妳個導演朋友只係以為妳突然走先，所以幫妳執埋嘢走？」
「應該係喇！我見個電話跌爛咗，所以佢搵我唔到囉。」
「就算係咁，佢都太粗心大意啦！點可能相信一個女仔自己深晚或晨早落山，而竟然好一廂情願咁覺得個女仔安全呢？」
「做我哋呢行，就算點都好，都唔係咁易報警。」
「咁又係。」我再想想，續說：「但係都無理由要妳繼續曝屍荒野，如果比啲野獸咬嚟食，或者比蟲蛀……」
「咁你仲唔立即抱返我上嚟呀！」
「小姐，先唔好諗我點跳落去，又抱返妳上嚟。妳有無諗過之後又點呢？唔通我拖住妳條屍返市區搏上頭條，再比警察拉？定係我就咁放喺平地先？咪一樣有蟲蛀！妳要知道人死咗就係咁㗎啦！無論妳生前幾靚，有幾聰明，每個人死咗之後都一樣係咁公平，一樣只求安息。妳明唔明？」
游凱玲思考了一陣，默默地點頭說：「我明白啦！」
那一刻，我期待神聖的時刻來臨。即使是深夜時份，但當靈魂能放下前塵，那卸下重負後豁然開朗的微笑，總會被柔和及溫暖的光線包圍。然後，靈魂就會被引渡到極樂世界。我凝望著眼前的游凱玲，回顧從網絡上得知她的一生，總算在最後幾年精彩過人。這大概算是不枉了。
我跟她微笑，輕輕舉起右手，預備跟這位短暫的朋友揮手道別。也許，是我不捨得讓時間停住；也許，是我太累得忘了時間的概念。我總覺得這一晚，這一刻很漫長。
「喂！你發完呆未呀！」游凱玲不耐煩地在我面前揮手。
「妳唔係應該走嘅咩？」我感到詫異地問。
「而家咁夜，你都睇唔到路啦！」
「我意思係妳又唔係有冤屈，就算枉死都知道咗點死，乜唔係要登極樂咩？」
「我點知呀！專家！」
被她如此叫了一聲「專家」後，竟令我冷靜下來，想到唯一原因。
「妳仲有心願未了？」我半信半疑地問。
「一開始已經講咗啦！我同你合寫本書嘛！」她理直氣壯地答。
******
有誰想到當我翌日回家時，竟然被一隻幽靈小狗嚇得差點倒下。當門打開一刻，那隻在我家逗留的小狗竟然一下子撲向我。不過，牠的目標卻不是我，而是直接穿透我身體後的游凱玲。小狗瘋狂地搖動著尾巴，還不斷攀爬她的一雙長腿。我實在看傻了眼，那有幽靈如此活潑呀！
「小白，係唔係好掛住我呢？」游凱玲對著小狗問。
「妳幾時幫佢改埋名㗎？」我問。
「前晚你瞓咗嗰時囉。咁我同佢都唔洗瞓㗎嘛，咪一齊玩囉。」她轉頭望向小狗：「係唔係呀？小白！」
「咁佢想投胎都難啦！」
「點解呀？」
「佢明明可以慢慢放低，而家變成對妳有牽掛啦！」
「真係㗎？」游凱玲反而興奮起來：「小白，你係唔係掛住我呀？真係乖啦！咁我哋遲下一齊投胎，好唔好？」
當我正想取笑她白痴之際，那隻小狗竟然像知道她的心意一樣。
「汪！」
這是我第一次聽到……小白愉快的叫聲。我開始懷疑到底我之前為牠所做的，是否已經被女神一夜摧毀呢？
（待續）
其他連載：
柏原太賀facebook：
https://www.facebook.com/Kashiwabara30
photo source: Amy Treasure
