最近收到太多諮詢感情嘅messages，無法一一回覆。只能話，好多人，無論係男或女，都唔識得調情需要嘅語言技巧——含沙射影。所以你哋先俾人置入friend-zone。
何謂含沙射影呢？簡單！講爆嘢，然後收返，兼且道歉；模稜兩可嘅一啲comment；平庸嘅對話，但係加上誘惑嘅眼神。呢三種方式會潛意識地話俾你嘅對象聽你嘅心意。就讓所有嘢都係影射性的。
舉例：
女仔對誘惑對象話佢男朋友喺呢段關係中試過出軌，女仔一直懷恨在心，想對對方做出同樣嘅嘢，然後誘惑地望住你。然後話：「我講笑，千其唔好當真。請忘記我頭先講嘅嘢。」
點忘記？！更加忘記唔到啦！仲好牢固地銘記在心添！
用直接嘅講法，完全赤裸裸地講你想要嘅嘢，可能會令你感到好舒服——因為你誠實。不過除非你係我親戚林敏驄，我覺得唔會好有效果。每個人都有佢哋自己嘅想法、睇法，由於習慣和歲月而根深蒂固。你講嘅嘢，入到佢哋腦度係要同佢哋本身想法競爭，其實好難贏。而且人一般都討厭被人遊說——好似佢哋自己好蠢要你教咁。
含沙射影就好似電影Inception咁。透過一啲非直接嘅言語嚟投下暗示。個暗示一定同情感有關——一種還未被滿足嘅pleasure、生命中缺乏嘅刺激等。個暗示喺人腦海裡徘徊，但係對方好快忘記係你俾嘅暗示。一段時間後，個暗示變為對象腦海裡自己嘅想法，就好似對方一直都有呢個想法咁。於是，佢會覺得係佢自己想要你，而唔係你主動追對方。
所以要做嘅，係同人講人哋本身想聽嘅嘢：快感、財富、健康、冒險等嘅可能性。到最後，佢哋會覺得你正正係可以俾到佢哋呢啲嘢。佢哋會自己走埋嚟，忘記其實係你本身暗示咗俾佢哋。
結論：誘惑異性最好嘅做法，係唔好直接話你有幾愛一個人，而係讓對方從你嘅舉止裡面閱讀出嚟。但係依家嘅人舉止實在太含蓄。
建議：放下自我，厚起臉皮，但係依然含沙射影，切忌唔好太直。
林作
FACEBOOK：https://www.facebook.com/jolamchok/
圖片來源：《我暪結婚了》
