深雪︰
你好！看見前兩段讀者給你的問題都很有同感，當中令我有些啟發及共鳴。
我同男友剛拍了一年拖，我今年都34，佢37。我們是識的，我誤會佢係我朋友的朋友所以才跟他傾計，傾了差不多3個月左右，佢生日叫我同埋佢的朋友一起食飯。出去了，感覺都還可以。1 星期多點就一起了。
一起才數天才從他同朋友對話當中知道佢的「背景」。佢20 來歲時曾經坐監，入黑社會，打架、犯案、吸毒，後來因為佢覺得收入唔多而冇再行古惑了。佢平時都很粗口，又煙又酒，當然行為舉指都很粗鄙。不過初時一起他都盡量係我臉前表現「斯文」同細心，對我又愛錫。拍拖剛一個月就主動送了個數百元的化妝袋給我，拍到半年左右開始出現問題了。
我開始發覺每次拍拖節目都是跟他的一大班朋友坐「大排檔」食飯，冇咩2 人世界。明明說好了來接我放工，又突然說有那個這個都來一起食。我一直都忍，因為從前的我是很「公主病」 常發脾氣，我不想重覆咁再犯。有一次又說約好了來接我，點知又是約多個朋友出來，我盡量忍著，到了大家一起回家時（我間中會在他家留宿）我就開始發怒，唔出聲，佢都耐心甘氹下我。
後來我說出了唔鍾意佢突然約朋友，他就說因為（那）個人生日所以先約佢請佢食飯。後來又再係咁約會時總係有朋友在場，我真的很怒。又在朋友走後，真的失控了，不斷咆哮佢，又走咗去，又講分手，佢氹咗一陣自己都走了。後來我主動搵佢叫佢接我走，但返去時又再吵，吵到夜深，佢很怒，好像（黐）線佬一般係咁大力打個衣櫃，很恐怖，又在咆哮。
我很驚，自己靜坐一角默不作聲，等一會還拿水給他飲。我是否就是做到你所講的「抽離」？因為我明白佢當時咁失控，我再激起佢就再收不了科。
不過，我從來都冇一個咁大脾氣的男友，所以都很驚！後來大家平靜了一些時，都達成咗共識就係佢盡量都要一星期有一日係全日陪我，其他時間約朋友要先跟我說，我如果決定去就不要再吵。
其實說來也可笑，佢其實又要約我又要約朋友是因為想慳錢，佢又想見我又想約朋友所以咪約埋一起出來。唉！這件事都可以叫做大家互相讓步了。雖然之後都係間唔中再有又話約我又約朋友的事發生，不過唔太過的我都冇再點出聲了，因為吸取從前的經驗，我很怕再在這問題上打轉。
但係問題又來了。初拍拖時，他常說結婚，到後來我主動問他何時結，他才爆出佢原來之前結過婚，分開了多年，不過兩方都未正式攪好手續。
我真的十分驚訝，因為他一早都跟我說過是結過婚，後來性格不合就離婚了。誰不知原來他是說了一半，其實是未離。佢跟我說時已在律師樓攪離婚手續了。他每次都有帶我上去律師樓，我都一直清楚個進度。
呢件事，我當初都有質問佢，佢就不斷咁逃避講點解咁多年都唔肯攪離婚。後來佢話我逼佢太緊，佢同我講不如分開。我當時諗咗兩三日，又問朋友傾訢，嗰時好唔開心，唔知點做，問自己係咪冇晒道德觀念，做咩同個法律上已婚的男人一起？
唉！後來，當然是不再問下去，又再和平了。唔知咩心態，我喺呢件事後，不斷係咁自我舖排將來個婚禮點攪，又問人意見，又約影婚沙（紗）相咁。但係佢呢？佢跟我的budget 真係差很遠。如他想1 萬，我是想5 萬，他又不肯講自己有幾多儲蓄。我就好像一個逼婚的惡魔日日在問他幾時結，幾時安排。
因為佢要申請離婚都要等半年至8 個月才可以完成手續，所以，都唔知怎樣預時間安排，可能佢欺騙了我未離婚所以我變得冇安全感所以不斷咁逼婚。
唉！後來吵了數月後，我都開始覺得不是味兒了，那時先覺得大家價值觀好像很不一樣。如佢覺得結婚只是簽個字就算，不用求婚，不用介（戒）子，可能著回普通的西裝就可以了。我不是想要一個千萬婚禮，只是想有個傳統的婚禮。求婚、擺酒、影個婚照而已，全部都唔需要貴價，只是想有而已。但是，跟他的想法都很不一樣， 我唔想因為咁又再吵分手所以我唔再講「結婚」任何事了，大家都叫做平靜下來！
後來，都是一些小問題而吵架，如佢的朋友幫我改花名我唔鍾意佢唔幫我解圍，仲要陪埋笑一份；在fb add 唔同女仔大部份都係樣子唔錯，叫佢唔好再加佢應承了後來又再加。不過，肯定佢冇咩出軋，因為佢去邊都帶我去，平時就回家跟我MSN，所以，我都唔想再吵又唔出聲，由佢！
仲有，就係常在讚呢個女明星靚、粗口、黑社會口語咁，我有朋友都怕咗佢唔回應佢的post，我覺得很失禮我，所以又嘈他。大家吵完幾日，慢慢佢都減少了。
仲有就係平時同我出街就有很多電話打來，都是講一些無謂事，不過就是半個鐘一個電話，我跟他說不滿，又吵過幾次，佢始終都係唔肯去正視下個問題，例如叫朋友少打來，或唔好聽一個半個電話。吵鬧後，佢應承我盡量講15 分鐘，我都盡量妥協了！
其實我慢慢明白到大家係唔同背景的人，我有時都唔去咁計較佢的「粗鄙」。我只是想佢知我唔鍾意，想佢為我改少少比我睇下佢的誠意。我都知佢遲早會再犯，只不過起碼都叫做曾經改過啊！
最近很奇怪，我不斷在想是否應該跟他分開。因為，我突然間覺得從前對佢的粗口、煙、酒都唔太在意，現在感覺唔太接受，又不斷在想他的不好，最重要的是，婚期？佢遲遲都未比到個「日子」我，其次係感覺有時吵架都是我去主動跟他和好，主動跟他傾，跟他解釋，他每一次發脾氣時都未了解人哋個心意就發火先，跟他解釋佢又唔聽唔肯明，又主觀又常認為我的層次、思想低他很多。
朋友說過兩個人要互相欣賞才可以長久呢。其實在戀愛中我時常都是有點令男人由愛我變成憎我，我點先可以「轉變」這局面呢？
我時常給男友投訢是︰煩、長氣、唔獨立，其實有時我都想做個令男人愛錫的女人，不過有時一有咩不滿我總是寫在臉上會立即發脾氣，同用「哦」呢種方式令對方妥協，我應該點再改進自己呢？
還有，結婚的事，一來，我真係猶豫了，他的脾氣、性格我是否「就”」得來呢？二來，如果是決定嫁他，那應該點樣跟他再傾婚事呢？我唔想被佢感覺得我很有逼婚感覺很cheap，我希望大家可以好好咁傾達到50% 大家都滿意的局面，唔想大家結都結得唔開心。
謝謝你寶貴意見 & 生活愉快！
CC
CC︰
其實，我看到的是，你不夠愛他，亦不夠欣賞他，甚至，你嫌棄他，介意他。
他所犯的，都是小問題，例如，約你又約朋友、不夠錢搞婚禮、粗魯、無禮儀。
他的而且確是個粗人，由頭至尾都無瞞過你。
你的表現，諸如「哦」他、煩他、嫌他、管他、限制他，都代表你非常不滿意他。
他從沒有犯過嚴重錯誤，你已經要寫信來問我了。
你要記住，若然你真的嫁給他，你就會有個「失禮」你的老公，他坐過監、行過古惑、常常粗口爛舌、難登大雅之堂。
你問心，你能忍嗎？
要是，你覺得你一世都會介意，那麼，你不要嫁給他。事關，他不會改任何事，而你，會一世不開心，覺得自己嫁得比其他女人差好多。
好吧！該如何是好？
你最好嘗試去真正愛上他，不介意他的所有小缺點，甚至，認為他的缺點夠 man 夠粗豪夠性感。
要是你試過，真的無法愛上他，那麼，分手好了，別累人累物。
你知道嗎？坊間有許多女人，她們不單止不會嫌棄他，反而覺得他好型好酷。她們會真心愛聽他的粗口，會覺得他的過去夠傳奇，也不會逼他花錢搞結婚。
你 34 歲，想再找對象，還是可以的。你想要一個出得場面的正常人老公吧！那麼，你去找一個。你想找，一定有的。
不要怕因為年紀漸大而遇不上真正合心意的對象，天下間的男人還是有很多。
最怕就是，你一邊嫌棄他，一邊逼自己揀他。
甚麼是悲劇？這樣，才是連累自己一生的大悲劇。
深雪
