深雪小姐︰
你好。客套說話唔多說，容我直入困擾我的感情煩腦。
事情要追朔番去個多月前的一個特別課程。喺依個班上我認識咗angel。佢係同我同校唔同科，所以有時喺學校見到大家，而佢係大家公認嘅女神，而我則冇這樣的感覺，只是認為她是一個樣子不錯的女生。大家最多都係互望兩眼就算。之後主動想識佢拎電話 whatsapp個d，多d了解佢。有一次佢主動話喺學校canteen 會覺得我吸引會偷望我。我覺得雙方都有好感，所以我就約咗佢出街睇場戲。
喺個次嘅約會入便，佢有攬住我隻手睇ending，大家有講有笑好舒服，佢仲提出去食糖水，我地仲有互餵同交換食淨嘅一半糖水食，最後送到去MTR佢提出話冇落雨不如行返去，我當然冇問題啦。完咗個晚約會佢msg 我話：同你出街好舒服，到依家我仲念念不忘個次約會。
之不過可能係因為angel 本身係O Camp helper，個時啱啱好又係暑假，所以我哋都有20 日冇見，只係keep 住msg 傾計，而我就定咗一個日子，約咗佢開學之前同我去主題樂園玩，angel 都好爽快答應。
一日接一日過去，中間嘅時間難免有胡思亂想，更加有神經質過係咁諗點解有陣睇完msg又唔覆呢，事後知道佢原本（來）真係好忙，係我太多worry。
到約定前幾日，我有輕微提過後幾天是約會日，可是她的反應好像有點兒不在意，可能她身心太攰吧。
到約會天的凌晨，我不斷msg、打電話，還是等不到她主動的回應答覆我明天的時間，我忍不住主動問她︰是不是不想去主題樂園？過了一會兒她答不是，我剛剛不開心去了飲酒。這一刻我知道的不是再怪責她什麼，而是想她心情好一點，所以就推後這約會。
又因為我太掛住佢，太擔心佢，我之前有寄過小禮物比佢，所以知道佢嘅地址，所以我就喺佢訓緊教（瞓緊覺）嘅下午時間去咗佢屋企後樓梯貼咗d memo 圖案，哄她開心，可惜她在我到達樓下的時間醒了一醒，之後就訓（瞓）番了，所以我一個人就望住海徬等咗4、5 個鐘，到佢醒咗我就叫去樓梯睇啦，我feel 到她的反應係好開心嘅。之後我問佢可唔可以同你食晚飯，佢竟然答我原本約咗朋友去唱k，個一刻我係有d 心淡，最後佢話一齊坐車出去，不過係坐車期間反而……
喺等車期間，因為佢啱啱起身都未食嘢，買咗個包買咗盒milk，食食下佢竟然主動餵我食個包，係開心嘅。上車後一會我主動拖住咗佢隻手，因為太cold，佢係接受嘅。之後我話你仲眼瞓，我就叫佢瞓落我膊頭一陣，到差不多落車嘅時間我仲輕吻她的面一下，最後我仲好心急咁問︰依家你可唔可以做我女朋友？而她搖搖頭，但我看出事出必有因，但我就沒有再追問。
過了幾天，她主動說起︰我知你對我好，但係我真係唔知點回報你。我都答咗佢唔係要什麼回報，只係想佢開心，我又大膽估佢搖頭嘅原因係因為未ready好拍拖，個一刻佢講我先知道，原來個多月我認識佢個陣，佢先係啱啱同上一個分手，到而家都未放得低，我投入佢角色講返比佢聽，佢都知我知佢點諗，所以同唔到我一齊，同埋唔想我等佢放低。
講完之前嘅對話，講番之前主題樂園。原本嘅主題樂園飛好早之前買咗，佢都表明咗唔係唔想同我去，只不過係冇時間。講完上面d野之前，最後決定咗20號晚入去。
依家問題有幾個︰
1. 我應該點做？
2. 去主題樂園制（製）造氣分（氛），攬住佢重新表白一次，用新戀情令佢放低？因為我知感覺依樣嘢話唔埋，我唔想令一段大家都有好感嘅感情後悔。
3. 她想知我係咪真心？食過檸檬敢唔敢重新追求佢？
4. keep 住依種關係，到佢有一日自己主動同我講放低咗，I am ready？
雖然只認識了個半月而已，但係我認定了她是我的愛情不是友情，請指點迷津，謝謝！
祝生活愉快工作如意！
迷茫嘅小肥
迷茫嘅小肥︰
看來女神無意和你拍拖，但有意和你做 friend，又或是，不介意你做觀音兵。
女神嘛，有心情就對你好、餵你食兩啖、覆你訊息；無心情就爽約、不理你、求其應酬你。
我只能說，如果她想和你拍拖，就算她未忘卻上一段感情，就算她好忙，她都會應承。
如今，她拖慢與你相處的進度，又不情不願，擺明是對你無意思。
但基於你又不討人厭，於是，她無絕情地以後不見你。
以後，你把你自己的角色定位為朋友吧！然後，你去看看，有沒有其他女生讓你心動。你去追其他人吧！
她是女神啊，追求者會好多，說不定，她現時就有一打追求者，煩不勝煩。
我也想說，你覺得那次約會與她好有 feel ，可能，其他十一名追求者都一樣覺得和她約會好有 feel 。
她是女神嘛，女神自然懂得如何令像你這般的小男孩有 feel 。
你要自知，你只是學生、同學仔，又不是勁標青的，我問你，你可以做甚麼去突出自己？基本上是無！就連帶她去高級餐廳、送她具體面的禮物，你都做不到。
你永遠不會知道，像她這種女神，心底裡究竟想要個怎樣的男朋友。
你覺得她值得的話，就留在她身邊去做一個愛護她的男性朋友，不求拍拖的回報。
深雪
