深雪︰
你好。他是我的初戀，一起快三年了，他一直對我很好，除了會犯一些天下男人都會犯的錯。每次我發完脾氣都會笑著原諒他，但上幾個星期我發現他有一晚失蹤找不到人，不是工作太累睡著了，原來真相是返大陸、那刻我真的很生氣，狠下心腸說分手、結果他很害怕，一直求我，我下咗啖氣之後決定原諒。
原本這幾星期相處得都幾好，但昨晚佢有朋友生日要去飲酒，問我去不去，我拒絕了，我覺得既然去玩就應該要有空間，不過就要求佢三點要返到屋企，佢都話兩點多就會走。佢去到也一直有同我wtsapp，兩點半話切完蛋糕就走，之後一直冇回應，我再打俾佢電話已經唔通，打到三點半終於聽，話搭緊車返緊嚟叫我唔好嬲，咁我一直等，等到四點幾見佢仲未返到又再打，又係唔通，照道理尖沙咀返嚟一個鐘都唔洗，等到五點，都係未返。
我真係好失望，一怒之下剪斷佢新買既鍵盤滑鼠線，連佢最寶貝既公仔都剪爛埋。最後佢六點幾wtsapp 我話醉咗，叫我開門俾佢。
返到嚟佢望到隻公仔爛咗好嬲，我問佢去咗邊佢竟然話醉到喺街到坐，我望佢電話見到仲有電，覺得多數係刻意熄電話，再睇到佢同個朋友信息內容，佢真係三點幾就走左，但有幾個鐘去咗邊呢？唔通真係喺街坐？
到夜晚等佢放工返嚟，我嘗試同佢好好傾咗，但佢仲係好嬲，仲叫我死返自己屋企。
好多朋友都叫我分手，唔好再浪費時間係佢身上，但始終三年感情，講就容易，我應該要點做？要放棄三年的感情？
Alice
Alice︰
他返大陸那次，你發火，好合理。
但這次，他和朋友玩，喝多了，想繼續盡慶，你卻發癲，破壞他的擁有物，他當然會反擊。
說真的，他只是個後生仔，貪玩、想跩跩，都好正常。
你明白嗎？你愈是管他，他就愈反叛。你要求一，他就做二。
這一次他反擊你，甚至要求分手，其實好合理。一對戀人，相對流流長，你總不成每次管不著他也破壞他的擁有物。你這種行動野蠻而專制。
本來，他不守諾言是他不對，可是，你做破壞王，就變成你不對。你已由上風變成下風。
這一次，你唯有死死氣認低威，告訴他你會懂事、成熟，不會再胡亂破壞他的物件；也不會再管束他，你會給大家自由，但就需要大家答應對方，自由不代表可以出軌。
你的男朋友可能是個反叛男生，而他會希望，有個給他自由、能體諒他、有些少縱容他的女朋友。
做女人，要懂得「縱」男人，不是叫你任他去滾，而是，在忠誠專一的情況下，給予男人合理的自由度。
若然他今次趁機飛掉你，那麼，你下一次，就別太管束你的新男朋友；又或是，揀一個非常乖仔的，不愛蒲不愛玩不愛上東莞。
深雪
