深雪︰
問你之前都諗咗好耐，預咗俾人話，不過我想搞清楚少少嘢，所以真係想聽多幾個意見，唔該你啦。
我同女朋友（可以話前度架啦）一年前網上識嘅，佢三十幾歲，外貌身材都唔差，佢對外面d人都幾有性格，串嘴嗰種，但係佢對我就真係好到我都唔知可以點形容︰
從來無發過脾氣，一句都無，黑面都無。
除咗最初識嗰陣我會見佢好密之外，其他日子我差唔多兩三個禮拜先見佢一次，一來我份工又忙，二來有時我又走去溝下女（當然唔會俾佢知），但係佢怨都無怨過，唔見嘅時間剩係喺whatsapp個度話掛著我之類。
出到嚟剩係上去我屋企「搞野」，佢都唔會話嘈生晒、阿吱阿咗，有幾次我屋企有人，要去爆房，我無錢喺身，叫佢出，佢都唔介意。
平時每日自動報行踪，但從來都無要求我要做同樣嘅事。
我乜都無買過俾佢，反而佢有送嘢俾我，直至有次我都唔係咁好意思，叫佢唔好再送嘢俾我。
我真係唔可以再挑剔佢d乜，通街港女，我自己都閱女唔少。我認衰，我鍾意溝女，鍾意剛剛溝到上手嗰種成功感，但係唔鍾意拍拖。以前條條女，唔係頂我唔順閃走咗，就係我話飛就飛。呢條女我真係做唔出。
其實拍拖無耐佢已經有fd周到我溝女仲話咗俾佢知，嗰次我都覺得九成散梗，點知佢話只要我鍾意佢就得。老實講，係幾感動，嗰排我都收心養性咗，但係人就係咁賤，感動真係得一陣囉，過咗一輪我又身痕。
早排我屋企有事，我就的起心肝，借個勢同佢講好煩想分開。一來我都知自己唔生性，咁好嘅女仔我做乜要拖著佢；二來我又無錢。雖然佢唔係講錢嗰種女，但係唔通要佢成世跟著個男人，但又食自己用自己？三來我真係無時間。
當然講完分手，佢就梗係喊苦喊忽，又求我之類。佢話佢本來就對婚姻無打算（初初一齊佢都有講過類近嘅嘢），剩係想同鍾意嘅人一齊就夠，仲話會等我。因為好唔忍心，我就唯有同佢講順其自然，睇下遲少少心情點先再算。
再早幾日，佢以為我嫌佢煩，話以後會努力控制自己，我都再同佢講，係無乜分別、無乜用，但係當佢再話要等我嗰陣，我就答佢佢鍾意點就點啦，我真係無佢乎！
同佢相處一年，我對佢唔多唔少都有d了解，佢係一個好堅持嘅人。其實我已經同佢講過好多次我唔值，但係佢每次都總係笑著同我講「我覺得你值咪得囉」。我個心其實係冧，所以真係做唔出扮失踪。
我知佢真係會好痛苦，由我講分手到宜家兩個月，同佢keep著有whatsapp，佢日日一樣同我報行踪，佢身邊有乜事發生都照會同我講，一樣咁關心我，我亦一樣有覆佢。有時叫自己忍心少少，唔好覆佢，但係見佢好似好驚自己講錯嘢咁嘅時候，我又唔忍心又覆。
分咗手兩個月，我知有仔溝佢，我亦知佢拒絕咗人，我都無去溝過女。我以為自由咗，我會從回溝女嘅日子，唔知點解整整下反而比同佢拍拖嘅時候覆多咗佢whatsapp，比以前仲諗多咗佢嘅感受。
我真係覺得好煩，究竟我係咪真係鍾意咗佢？定係又俾佢感動到？連我自己都搞唔清究竟宜家同佢叫散咗未，散嘅應該無可能連一日斷聯絡都無架。嗌復合，唔係無諗過，我又驚係一時衝動，無理由到時又再講分手架。
但係近排個心又會諗，遲下如果佢真係放棄咗我，或者跟咗第條仔，咁唔知會點。 我又驚到時自己會後悔，成世仔真係老豆老母都無佢咁關心我，有時都會諗其實係咪只係我自私。
總之我宜家連自己係咪叫鍾意佢都唔知啦，不如你俾d高見我。
CP
CP：
執到寶，要識寶。免得你後悔終身。
你的問題是，遇上一百分的女朋友，卻又無勇氣去好好建立一段關係。
你肯定是喜歡她的，要不然，堂堂大男人，說分手就分手，不會寫信到 she.com 。
只是，你欠缺了「從此認定她」的那份勇氣。
而你的猜測是正確的。只要她真的決心被其他男人追求，你就會好後悔，不再想失去她。
其實，你心知，你有種自卑感，覺得自己配不起這個一百分的女朋友，壓力太大了，不如放生她。
你這種做法，可以稱之為偉大，但亦等於懦弱和無用。
正確的做法是，因為她那麼好，你就從此的起心肝做人，為了她的幸福而努力，不獨在事業上拼搏，亦從此學懂如何去愛一個值得你愛的人。
你有沒有想過，這個一百分的女朋友是上天送給你的禮物？
上天沒把她送給其他男人，唯獨是送給你。
既然如此，就感謝上天吧！別浪費天意，好好享受這份禮物。
為甚麼她是禮物？她這種女人，能夠令一個男人大躍進地提升，由原本五十分，變成九十分。
可能，她就是你一生人的最強大轉捩點，就是她，令你由不知所謂，變成真正的男子漢。
你回想一下，你的半生人中，無無聊聊，除了她之外，有甚麼好事情發生過？
這個一百分的女朋友，就是你的人生亮點。
有點自信吧！不要萬般理由趕她走。勇敢一點，學懂接納愛和去愛。
週圍溝女，從來不是有型，當中的真相是，你不肯付出感情、無承擔力、逃避建立。
小男孩，是時候長大了。
深雪
