二噁烷超標！ 7款洗頭水被檢出超歐盟上限

平時用洗頭水，唔知大家會唔會洗完都覺得痕？如果出現呢個情況，咁大家就要留意用梗果款洗頭水適唔適合自己喇，根據消費者委員會（消委會）嘅報告，測試咗60款洗頭水，發現當中38款被檢出二噁烷（1,4-dioxane），對於過敏肌膚人士，或會出現敏感反應，當中仲包含咗一啲常見嘅品牌，大家記得要留意一下。

消委會搜羅市面合共60款不同型號的洗頭水，樣本中有38款檢出二噁烷，含量介乎1.1ppm至24ppm，符合內地《化妝品安全技術規範》2015年版要求的限值30ppm，但當中7款檢出的二噁烷含量介乎12ppm至24ppm，高於歐盟消費者安全科學委員會（SCCS）建議化妝品的安全水平（10ppm），品牌包括沙宣、潘婷、CLAIROL、ELENCE 2001和海倫仙度絲。雖然被檢出的二噁烷含量對消費者應唔會構成安全威脅，但若本身有敏感性肌膚，或會受二噁烷刺激，會有較高機率出現敏感反應。

事實上好多洗頭水都冇詳細列明成分資料，有時揀洗頭水嘅時候都難以落手，就以二噁烷呢種成分為例，大部分產品都唔會列明呢種物質，但如果大家見到成份表上有寫SLES（sodium laureth sulfate）或ammonium laureth sulfate呢兩種表面活性劑（surfactants），其受二噁烷污染嘅機會較大。使用含有SLS（sodium lauryl sulfate）和SLES後，記得要用清水徹底洗淨殘留在喺皮膚上嘅產品，特別係有敏感膚質嘅人士，否則或會出現繃緊、乾燥嘅感覺。