advertisement
追求美白肌膚係所有女生嘅終身事業，但係夏天嘅來臨就係所有女生嘅惡夢開始！唔想等到太陽伯伯主動出擊先至「見光死」，依家就要開始認真制定今年嘅「美白抗 UV 攻略」！
外用美白有極限
唔知絲打們有冇發覺，雖然依家好多化粧品、護膚品、防曬面霜等都聲稱加入咗好多先進科技，具備超強對抗黑色素乜乜，同埋超強抵禦 UV 功能物物，但係肌膚白到某一個程度，就會停滯响一個「半白不黑」嘅狀態，有啲人稱之為「美白樽頸位」，無論再搽幾多貴價嘢都好，美白效果始終唔夠理想。
中醫就會用一個較為宏觀嘅角度去睇美白呢件事。中醫認為，肌膚狀態其實係反映緊體臟腑功能嘅好壞，即係健康好，面色自然會白皙、紅潤、容光煥發。換句話講，想得到美白肌膚，一定要先由內至外提升健康。只要識得調理身體、扶正平衡，再配合正確嘅防晒護理，每日肌膚白裹透紅絕對不是夢！
針對氣血虧虛，先補身，後美白
具體嚟講，環境污染、生活壓力、作息唔定時等好多原因，都會令人氣血虧虛，造成面色暗啞同色斑積聚等嘅肌膚問題。中醫會按照個別體質屬性，教你平日點樣從中藥處方、食療同生活習慣等方面著手，選擇適合自己嘅美白方案，例如用杞子、紅棗、桂圓泡茶，就有補血氣、明目、潤肺、補肝腎嘅功效，適合大部份人嘅體質。
至於坊間流行嘅一啲「美白餐單」，教你一日三餐飲檸檬汁，或者進食大量未經煮熟嘅新鮮蔬菜之類，就唔係每個人嘅體質都接受得到！或者你都聽過身邊好多絲打都出晒事，話試過先知呢啲餐單寒涼過頭！不如都係聽吓中醫點講，唔好再亂咁攞身體黎較飛啦！
本文作者：黎小慧中醫師
註冊中醫師，南方醫科大學中西醫結合臨床醫學博士
