睇唔出入行13年！JM的時裝凍齡術

無可否認，Janice Man近年真係愈戰愈勇！作為「o靚模鼻祖」嘅佢入行原來已有13年，雖然初出道時被人話MK，不過憑著JM嘅努力，無論係演員定係模特兒嘅發展上，都已經成功搣甩個「o靚」字，外型變得時尚，電影仲一套接一套，實力有目共睹，連續兩年入圍金像獎嘅最佳女配角就係最好嘅證明，證明佢唔係單靠外貌和講英文先上到位啊！

咁當然，作為圈中公認嘅潮人一族，JM最受到大家關注嘅地方，就係佢嘅每個造型，尤其係每次穿起晚裝，先天的衣架身型加上獨到嘅時尚觸覺，可以話係謀殺晒所有菲林！趁金像獎前夕，今次就同大家一齊細數 JM 嘅百變造型啦！

紅毯晚裝

JM著衫最值得大家學習嘅地方，就係佢好懂得放大自己身型嘅優點，揀晚裝總會選擇高叉嘅剪裁，show到修長美腿，又可以若隱若現地耍小性感。

23吋小蠻腰同樣係JM嘅優勢，所以佢著see-through嘅晚裝就更顯腰瘦，性感得來仲帶點型格。

邊個話紅毯造型一定要少布，即看JM示範，例如好似佢咁著優雅嘅氣質蕾絲長裙或富玩味感嘅鮮紅色西裝，包到密晒都一樣可以成為焦點。

2013年金像獎時，JM以嘉賓身份出席，就罕有地收埋長腿，揀左一件低胸晚裝示人，露出纖瘦手臂同樣有看頭！

講起JM嘅紅毯look，不得不提上年金像獎JM首次提名最佳女配角時，著左一件超貼身超高叉大露背黑色晚裝（留意番個叉係開到上臀部架！）JM更坦言當晚自己係真空上陣，連底底都無著，博到盡挑戰終極性感，但最佳衣著獎都係俾左林嘉欣！

小洋裝

JM嘅紅毯造型固然吸睛啦，而平時嘅佢就經常以小女生造型示人，緊貼時裝潮流，多穿牛仔、充滿圖案、花邊細節嘅服裝，仲有保持活潑年輕嘅心境，呢個就係JM可以同13年前出道時一樣咁青春嘅凍齡秘笈。

休閒裝

女神都有慵懶嘅時候，睇JM Instagram D相就知，私下嘅佢其實係好鐘意隨性嘅運動風穿搭，但休閒裝絕對唔等於hea喎，好似係Tone-on-tone嘅Pastel造型或者Mono tone嘅黑白配，從細節見到有personal touch架！仲有今季大熱嘅slogan tee，都可以為休閒裝提升造型層次。至於晚上戴黑超呢？嗯... 呢個習慣就真係因人而異啦！

不過小編估計，大家最關注嘅，都係到底JM今年將會以咩造型亮相金像獎嘅紅地毯？聽晚自有分曉～