advertisement
香港長年濕度高企，好多香港人都俾腳臭、腳汗困擾，特別係喺室內要除鞋嘅時候，果陣「芬香」真係……但氣味嘅嘢，有時自己習慣咗真係會察覺唔到，一除鞋先知中伏，就真係會瞬間冇晒朋友，日本最近就推出一對「腳臭偵測鞋」（SENSING SHOES），俾你知道自己有冇腳臭問題，你又有冇需要？
呢對「腳臭偵測鞋」運作嘅原理好簡單，通過安裝在鞋底嘅感測器，感知腳嘅濕度同臭氣，按照臭度劃分了成5 個等級，再通過匹配的嘅app，就可以知道腳臭程度去到邊～
呢對鞋仲出埋男女裝，同樣採用咗 blueover 嘅經典鞋型設計—女款 mikey 同男款 marty，同另一半做情侶鞋，都幾有新意呀！
原來呢對「腳臭偵測鞋」嘅出現，係因為想宣傳資生堂旗下除臭劑品牌 Ageodeo 24最近發布嘅 「24小時除腳臭劑」，所以就同日本本土品牌 blueover 合作推出呢款鞋，睇嚟佢嘅策略又幾成功喎，小編都想即刻買返對，唔自用，送俾人都幾「貼心」呀！
不過好可惜，想買呢對鞋嘅朋友可能就要等下喇，因為呢對鞋只會喺 12 月 1 日至 7 日期間，喺大阪 blueover 店鋪進行公開展示，會唔會正式推出都仲未知，雖然暫時未有得賣，但大家都可以試下其他簡單方法除腳臭，例如食少啲碳水化合物有關嘅食物，好似米飯、意大利麵或麵包等，或者著鞋記得著襪等，咁就唔怕臭親人啦！
圖片來源：blueover、Ageodeo 24