【2017金像獎】今年紅毯誰最搶鏡？邊個又係隱形人？

第36屆香港電影金像獎昨晚曲終人散，而最令觀眾期待嘅紅地毯畫面，就叫人有少少失望啦，皆因不少入圍男女星都選擇以相對「穩陣」嘅造型現身，就連去年好敢露嘅JM，今年都保守了許多，小編想來想去也想不到哪套特別讓人印象深刻，反正一眾頒獎嘉賓仲著得更有看頭......

圖片：互聯網

首先在紅地毯上現身嘅有周秀娜和欣宜，二人合作嘅電影《29+1》即將上映，娜姐以一身全黑嘅VALENTINO造型亮相，走簡約路線，上衣雖然係Deep-V，但胸部卻嚴重縮水，相比起佢以往嘅造型，真係略嫌失色；反而欣宜嘅碎花長裙仲搶鏡，低胸得黎帶點飄逸，展現健康性感。

身為最佳衣著獎評審嘅任達華和琦琦，分別以粉紅西裝和藍白碎花裙現身，襯到絕之餘仲好有春夏氣息。

數到全晚出現得最多嘅晚裝類型，一定係黑色！楊千嬅、方皓玟、周冬雨都穿黑色，仲有章子怡的全黑 FENDI長裙！有走優雅路線、也有走型格路線，周冬雨更獲MIU MIU特地為她訂製晚裝，可惜最後還是失落影后寶座。

廖子妤和余香凝就以「黑白雙殺」嘅閨密look現身紅地毯，一個帥氣一個甜美！

湯怡係少有穿黑白晚裝以外嘅女星，以一身暗紅色露肩長裙示人，配埋鑽石頸鏈和腰帶，難怪一出現，連司儀都忍唔住讚佢夠高貴大方！

最令人失望就係上年博盡露股嘅Janice Man，今年包到好密實，只以透視裝隱若地露背和長腿，性感不再慘變隱形人，有同事更問：「乜JM有係紅毯出現過咩？」

獲得最佳女配角兼最佳衣著獎嘅金燕玲就以閃爆套裝登場，配上一頭清爽短髮好有個性！

另一位小編覺得著得好睇嘅就係王敏奕，一身白色tube dress加埋裙擺嘅花紋圖案，夠晒青春又好有氣質，同男友曾國祥襯埋outfit齊齊行紅毯，金童玉女咁款奉旨曬恩愛！

最後不得不提昨晚其中一個焦點余文樂，RALPH LAUREN白色西裝襯黑色煲呔，係型嘅～失落影帝都有最佳衣著呢個安慰獎！