【拆彈專家2】劉德華劉青雲相隔18年再合作默契不減

相隔18年再合作默契依然

相隔多年再跟華仔碰頭，青雲直言兩人默契依然：「時間多與少跟默契沒有關係，有些演員會特別有火花，等於今次《拆彈專家2》，大家有共同理念。」華仔也認為人與人之間的緣分很特別，「每次跟不同演員合作，好似入行初期同發哥（周潤發）等演員合作都會有特別默契，就算鏡頭冇特別交代是兩兄弟，出來感覺都會畀人是兩兄弟，呢個係演員間的化學作用，正如青雲同倪妮有一場戲，我在旁邊看，令我覺得『嘩』，成套電影充滿了演員嘅努力，有意想不到嘅驚喜！」

《拆彈專家2》中有連場槍戰、爆破、武打等場面，問到兩位影帝最難忘的拍攝場面，青雲坦言是當中一場「拯救」戲，二人登上一輛貨van，然後由吊臂將貨van吊上八層樓高，青雲說：「雖然導演有話吊高，但冇講會吊幾高，拍攝時候1､2､3就吊咗上去，我仲諗住會慢慢試，點知一take完成。」身旁華仔聞言即指：「雖然係好快，但見武指佢哋好認真，每次吊之前都會檢查條威吔有冇受損，以前拍戲就搵命博，而家會覺得被照顧，安全感好大。」

拍新片頓悟人生道理

雖然貨van一幕場面是驚險，不過最令華仔印象深刻卻是另一幕：「我最深刻反而係第一次同青雲開工，感覺好新鮮，好似見番個舊朋友咁，十幾年前合作嘅感覺番晒嚟！」

華仔與青雲，在過往的電影中，先後飾演過拆彈專家，不過《拆彈專家2》不約而同令他們有不同的體會，青雲說：「好多年前我演嘅拆彈專家，是帶有喜劇感，今次是實牙實齒嘅拆彈專家，有好複雜嘅行動同大型嘅爆炸，而且今次帶出一個訊息，有啲嘢失去咗係搵唔番。」華仔亦表示今次電影充滿令人反思的訊息，就連他亦有所覺悟：「意外同明天，大家唔會知道邊樣出現先，角色中嘅我，經常緬懷過去，然後又會話將來要點點點，但其實最重要嘅唔係過去、唔係將來，係現在，同時亦帶出世界上最危險嘅炸彈其實係人性。」

《拆彈專家2》故事大綱

香港發生連環爆炸案，全城人心惶惶。前拆彈專家潘乘風（劉德華飾）昏迷於案發現場，被警方列為頭號嫌疑犯，懷疑他跟邪惡組織“復生會”有密切聯繫。甦醒後的潘乘風，面對警方施壓式的盤問和牢獄之災，決定逃走親自查明真相。在孤立無援的絕路上，潘乘風找他的戰友拆彈專家董卓文（劉青雲飾）協助，但由於二人陷入黑白不明的矛盾狀況，董卓文必須在公私之間作出抉擇;基於出生入死的友情，他決定向摯友伸出援手。同時，潘乘風前女友龐玲（倪妮飾），現為反恐特勤隊總督察，急於查出連環爆炸案的幕後黑手，以確保市民安全，她說服潘乘風接觸”復生會”，追查這神秘組織的下一步恐襲計劃，以證明他的清白。然而，令潘乘風最意想不到的，竟是揭破真相就如拆除炸彈般危險艱鉅，在爭分奪秒中隨時送命……