吳若希公然數臭TVB「做嘢冇錢仲要倒貼！」 罕見高EQ回覆網民嘲演唱會滯銷＋回顧過往惹火言論

本週日（11日）吳若希（Jinny）將會於旺角麥花臣場館舉行出道以來首個個人演唱會《吳若希Let Her Be Jinny 演唱會2022》，近日吳若希積極現身為演唱會宣傳，但她在艾力的網上節目《Have a nice Date》宣傳時，又再一次語出驚人，竟公然數臭TVB「做野冇錢」，更開口回應當年錯失「最受歡迎女歌星」一事！

吳若希唔驚被雪藏自嘲：「吳若希告別演唱會」

一直是無綫「親生女」的吳若希日前在艾力的網上節目《Have a nice Date》訪問上，稱自己現時工作只為開心，更力數TVB工作賺不了錢：「你估喺TVB做嘢係為錢咩？全世界都知道TVB做嘢冇錢，仲要倒貼！」驚人言論一出，令主持人都不禁擔心吳若希公然爆料會被雪藏，反應快的吳若希乘機入位宣傳個人演唱會，稱是次演唱會為「吳若希告別演唱會」，作風認真大膽又搞笑！

回應菊梓喬事件：完全唔Care個獎

吳若希被問到2019 年TVB沒頒發「最受歡迎女歌星」給自己而給Hana菊梓喬時，她表示：「完全冇介意，完全唔Care個獎」，更指自己當時疑似嘲諷對方的動作只是表達慶幸沒有拿獎：「我覺得好彩唔係我攞咋，開心嘅原因唔係因為佢攞，而係因為真係唔好係我攞啊。」坦言拿獎有壓力，自己唱歌只為開心。

罕見高EQ回應網民「挑機」

吳若希雖然經常語出驚人，但近日她卻展示了自己的高EQ，事源即將舉行的楊千嬅演唱會頻頻傳出滯銷消息，有網民在相關報道留言討論時突然貼出吳若希演唱會售票頁面，並標記了吳若希留言：「唔好漏咗 吳若希Jinny」。面對網民的「挑機」，吳若希一反以往火爆作風，反而高EQ回覆：「多謝你幫我宣傳～～～係呀～大家記得支持！下星期日就係啦~～～」另一則在IG上的留言：「送飛都唔睇啦，唔該到時宣布埋離婚」也回覆：「你咁期待我宣布離婚嘅？你係咪好想娶我呀？唔好啦...」高EQ回覆獲不少網民大讚，更稱：「即刻買兩張支持先」。

出道以來，吳若希多次有出位及大膽言論，現在一起來重溫吧！

吳若希出位言論1：老公是「道具」

吳若希經常公開罵老公，其中一次更引起網民討論，因她分享一輯看似幸福的大肚婚照，卻是抱怨自己老公是「道具」，更抱怨：「sweet d 都要被指揮，可想而知他對我是有多愛」！

吳若希出位言論2：菊梓喬事件

2019年菊梓喬奪「最受歡迎女歌星」時，吳若希一句：「造畀佢都應該！」和瘋狂恥笑13秒引起全城熱議，其後她在FB指：「我都係特登諗過先講既～ 亦都唔覺得得罪人～～ 如有得罪，純屬你小器～我會繼續講我覺得應該講既嘢～多謝！」

吳若希出位言論3：咪嘴事件

吳若希曾在參與演出《明愛暖萬心》時被指咪嘴，她即反擊：「唔知頭唔知路，係度嘈。好好奇你哋又唔係我fans，又唔知發生咩事，又唔去find out發生咩事，反而用你哋啲咁寶貴嘅時間係度留言，係咪太得閒?!」其後又寸網民：「你咁鍾意我，咁留意我，我點捨得block你啫，仲要特登搵個第二個acc留言。我啲人氣咪咁樣儲返lor……多謝你哋。」