MIRROR新團歌唱出心聲重拾團魂？12子回顧5年發展！姜濤凌晨發文承認對叱咤感恐懼

在日前舉行的叱咤樂壇頒獎禮中，男團MIRROR僅奪「我最喜愛組合」一獎，對比以往的風光時刻，是次交出成績大不如前。正所謂「人多自然是非多」，過去MIRROR曾多次被批失去團魂，成軍5年間也是非不絕，踏入新一年，MIRROR就藉著新團歌唱出心聲，力證已重拾團魂奮鬥向上，而12子也回顧這5年發展吐出心聲。

MIRROR新團歌《Rocketstars》唱出心聲 12子回顧5年發展

MIRROR在叱咤頒獎禮上奪獎時，隊長Lokman說道：「2023年好多個我，但好少我哋；2024年希望可以一齊為大家、為鏡粉做更加多嘅作品。」講得出做得到，MIRROR於新一年推出最新團歌《Rocketstars》，歌名包含了Rocket火箭這個字詞，代表為MIRROR的發展帶來新的寓意與動力，亦喻意12子在不斷成長的同時，心態上都變得更加強，眾人會不斷提高自己要求，迎接一個又一個的挑戰，追求突破，像火箭一樣一路向星空進發，永不停步。

除了以新團歌唱出心聲，MIRROR的12子在也藉著這機會回顧過去發展，並預想未來的發展方向。

楊樂文 Lokman：「演戲信心大咗而唔係演得好咗，少咗疑慮，學識要放開下、感受當下。舞台上就自如咗，剛出道係全程Full Energy，而家識幾時有Punch 位幾時放鬆。未來想再做唔同小組歌，自己鍾意一班人一齊玩，唔同人可以衍生唔同風格，可以突破多啲嘢。」

邱傲然 Tiger：「過去最大突破係拍咗短片《是日精選》，完成後開始覺得自己做到啲嘢，會令我喺創作同製作上有更多信心。好慶幸有呢啲得來唔易嘅機會。下個目標係想呢幾年可以製作到一套長啲嘅作品，音樂上亦會探索一下唔同嘅曲風。」

陳卓賢 Ian：「五年前冇諗過會跳舞，唱團歌日積月累嘅經驗下，都出咗個人跳唱歌，另外就係沿源熱愛，曲詞編監都有做，涉獵多咗唔同嘅嘢。嚟緊會專注要做嘅嘢，喺不知不覺間就會達到目標。」

盧瀚霆 Anson Lo：「如果唔係喺MIRROR出道，唔會想像到自己係一個演員，以前好驚而家好鍾意演。音樂上一直係跳唱，都冇諗過出慢歌，而家慢歌都有5, 6隻，另外就係而家On Show冇咁緊張，只想享受嗰一刻想表達嘅Energy或者風格。嚟緊期待12個可以做舞台劇，未試過，如果可以喺舞台劇，對我哋嚟講，會係一個好大進步。」

陳瑞輝 Frankie：「起初怕鏡頭，唔敢喺鏡頭前釋放自己內在嘅一面，接觸咗真人騷、電視劇同舞台劇後，學到一啲表達自己嘅方法，亦累積更多演出經驗，令到更加自然自信喺觀眾面前表演，敢俾觀眾睇到自己好同唔好嘅一面。嚟緊我會更加踏出嚟，令觀眾睇到我自己。」

邱士縉 Stanley：「經過呢幾年努力訓練，唱歌方面開始有少少收成，穩定啲，會Enjoy唱歌；演戲上不停試唔同電視演出，累積經驗，都有好多行內人、朋友或觀眾肯定我嘅演技，對我演戲大咗信心，未來希望拍到電影，2023年都未Achieve到，希望今年可以Achieve。」

王智德 Alton：「之前推出歌曲都有參與Rap詞創作，甚至係歌曲嘅內容方向，構思到錄音到派台，有一手包辦感覺，係遠超於一個淨係唱歌。大家話我適合做綜藝，自己都鍾意想再試，但MIRROR嚟緊香港開演唱會再到World Tour，希望可以繼續平衡到，另外舞台上做到節奏明快帶到諗法嘅歌曲俾大家。」

呂爵安 Edan：「經歷5年好多訓練嘅機會，喺舞台上點樣展現自己魅力更加有信心，同時亦慢慢掌握到，更加了解到乜嘢係表演。嚟緊希望每次工作可以參與更加多喺入面，唔係純粹做演員、主持，而係投入其中，例如MV，同導演交流諗法，條橋點行點做，後期剪接等等。」

李駿傑 Jeremy：「以前好冇信心，但係有11個兄弟喺隔離傍住我去成長，多咗舞台經驗，令自己更加可以喺台上散發自信，心態上好多嘢睇得開咗，從迷惘到享受，自己都開心咗。未來希望可以用自己嘅力量，令到唔識我嘅人，因為我嘅音樂鍾意咗我，鍾意MIRROR，透過我嘅影響力，令到更加多人鍾意MIRROR。」

姜濤：「對舞台感覺唔同咗，愈嚟愈覺得唔係咁簡單，入行愈耐就知道愈多嘢做得唔夠好，尤其開演唱會，認識到自己嘅不足。演戲比想像中好玩，令我放鬆，釋放喺歌手身份上所承受嘅壓力。嚟緊都係最基本、最基礎嘅嘢要做好，就係歌要唱好，舞要跳好，呢啲係我哋嘅基本功，突破係需要基本功支撐，提醒自己唔好自滿。」

柳應廷 Jer：「喺舞台上嘅感覺Firm咗，以前缺少舞台表演經驗，自己信心冇咁強，但表演多咗，喺台上面自己會定咗、信心大咗。第6年好想Focus多啲音樂，或者每年開一個音樂會同fans見面，或者出一隻碟俾大家珍藏紀錄一下，希望做到一個大家都肯定自己嘅歌手，建立多啲里程碑。」

江𤒹生 AK：「入行想唱歌多啲，冇諗過會接觸到咁多拍電影、電視嘅嘢。第6年想試多啲唔同嘅工作範疇，然後想精化啲再做好啲。」

姜濤凌晨發文承認對叱咤感恐懼

姜濤自在去年初的叱咤樂壇頒獎禮因身型暴脹及表演中衝下台而成為一時熱話，後來又發生公審女網民風波，受到多方攻擊的他備受是非困擾。而在推出新團歌的當天，他就在凌晨發長文訴說心聲。

姜濤在文中指去年經歷了無數風波及浪濤，但現時回首才知道這都是他成長過程中必須學習的種種人生課題。他直指：「對於曾經批評、指責過我的人，無論你們是懷著好心還是惡意，我由衷想對你們説聲感謝，謝謝你們讓我認識到自己很多的不足，是你們推動我要更努力，邁得更大步。我從來不是一個只想生活在鮮花和掌聲中的人，所以如果我還有不足之處，請繼續多多指教。」

在日前叱咤樂壇頒獎禮中，姜濤沒有如去年般衝下台，而是在台上乖乖冷靜的唱跳歌曲，同時比以往更沉默沉默寡言，他對此坦言：「經過昨晚，我內心其實鬆了一口氣，這並不是因為獲得任何獎項，而是慶幸自己能在曾經跌倒的地方重新爬起來。坦白講，昨天剛踏入頒獎禮會場時，内心是害怕的，甚至可説是恐懼，但當看到台下每一個亮起的燈牌，我突然有了無窮力量和勇氣。」、「在過往的頒獎典禮中，年少輕狂的自己曾説過一些豪言壯語，我沒有後悔，因爲那是當時自己最真實的想法。但現在長大了，我更願意將想法付諸於行動。所以，請原諒我未在昨晚叱咤頒獎典禮的台上說太多話，内心很多的感謝，我會放在心中，然後用實際行動去報答。」

最後他表示在很多人眼裏，偶像應該是一個完美的存在，但自知身上還有很多缺點，希望在新一年能成爲一個陪伴著大家，一起去追求完美和進步的人。

不少網民都在帖文下紛紛留言，表示力撐，又指在新一年會繼續支持，鼓勵他「做好自己唔好放棄」。