- entertainment
- by Say八婆
- 2021-11-26
男團MIRROR成員姜濤是萬千姜糖心中的理想男友，沒有拍拖經驗的他，日前就爆出中學曾暗戀《全民造星IV》中的27號參賽者姜詠鑫（Ada仔），更有網友有討論區以「你問我答，全民造星4 Ada仔（姜濤中學暗戀過嘅女仔）爆料區」為題開Post，大爆姜濤中學時曾暗戀Ada仔，但Ada仔因姜濤身形肥胖而將他拒諸門外，亦有同學指Ada仔將他暗戀自己的事四圍唱。此事一出後，姜濤並沒有正面回應，直到昨天（25日）姜濤與Aga上Chill Club時，才直接拒認當年曾暗戀Ada仔。
姜濤拒認暗戀Ada仔 暗戀對象另有其人
姜濤承認Ada仔是他的中學同學，但就否認是他的暗戀對象，直認暗戀對象另有其人：「佢（Ada仔）唔係暗戀嘅對象，係朋友，並唔係好似大家講嘅嘢咁樣。佢嚟比賽我都有同佢講加油。唔知點解大家無啦啦就話我暗戀人哋。其實我都驚造成佢嘅困擾。」至於被問到姜濤中學有沒有被女仔收做兵，姜濤愕然地回應：「嘩……我諗我中學都應該冇乜女仔肯收我做兵，咁肥！」
細數姜濤暗戀尷尬事：10蚊Hello Kitty鏡事件
雖然姜濤仲係A0，但原來佢都係一個「暗戀王」，可惜無論以前定而家，佢對住異性都仲係好怕醜。如果講中學暗戀的7事，就要講「10蚊Hello Kitty鏡事件」。姜濤在《MIRROR頻道》節目中憶述，當時佢喜歡上一個女同學，想送小禮物給對方，於是去了灣仔太原街用10元買了一塊Hello Kitty鏡，準備送給心儀對象。
但當時身形仍屬肥胖的姜濤，因擔心被拒絕，唯有裝作不經意地送Hello Kitty鏡給心儀女同學A。「喂，有塊鏡喎，你要唔要呀？」同學A右揀左揀，最後竟然話：「唔使喇。」姜濤覺得有點尷尬，眼見當時同學A身邊有另一位女同學B，就唯有轉移對象，順便問同學B：「你要唔要呀？」同學B就收下了這塊Hello Kitty鏡。姜濤指：「我當時都係好隨便咁問，因為咁啱個女仔喺隔離。A唔要，B喺隔離，我問佢『你要唔要？』，但係我個心好痛，哈哈！嘥咗我10蚊呀！」
細數姜濤暗戀尷尬事：問Google點表白好
暗戀王姜濤暗戀次數多，但表白次數就少。話說有一次，姜濤想同暗戀對象表白，但又唔知點講好，就搵Google大神求救。Google就教佢講：「不如你做我女朋友吖！你做我女朋友我就會餵肥你喇！」當時天真的姜濤真係照講，結果心儀對象冇再覆姜濤，可能係因為女仔普遍都抗拒成為肥妹。姜濤事後解釋：「我以為咁樣表白老練啲，女仔會鍾意。」中學時代的姜濤真係好單純，希望姜濤下一次同女仔表白，唔會再搵Google大神求救，可以考慮請教MIRROR其他成員！
