謝霆鋒《海關戰線》專訪｜首次擔任動作指導、親身上陣搏到盡！片尾彩蛋主題曲創作歷程全面公開

entertainment
by sue wai
2024-06-27

身經百戰的謝霆鋒，由初出道出演《特警新人類》開始，已經親身上陣演出驚險動作。近年他更涉足動作設計，為電影設計武打動作、槍戰、爆破場面，《海關戰線》他更首次當上動作指導。近日電影公司發放了不少他的「操肌相」，背後付出多少自律與堅持不言而喻，在專訪中他卻劈頭說：「其實我好憎好憎好憎做Gym」，到底此話何解？

以香港海關搗破國際軍火走私集團為背景、由謝霆鋒、張學友、林嘉欣、劉亞瑟等主演的《海關戰線》，將於 7 月 5 日上映。謝霆鋒這次不僅擔崗演出，更首次當上電影的動作指導。（《海關戰線》劇照）

「其實我好憎做Gym」親揭刻苦鍛練原因

「我其實唔係一個喜歡鍛練嘅人，大家唔好誤會，只係我知道要拍戲，仲有唔想自己太易受傷，所以冇辦法先去練。」謝霆鋒為了操fit身型鍛練身手，接受多各種不同訓練：「其實我唔只做 Gym，會練柔軟度、Thai boxing、Rock Climbing，目標係訓練各種不同嘅技巧，提升身體嘅靈活度，令自己更硬淨，可以抵抗拍攝時可能遇到嘅撞擊，唔好咁易受傷。」他更透露其實如此養眼身型其實非單靠運動練成：「運動只佔 3、 4 成係真嘅，其實食嘢好緊要。為咗訓練我嘅飲食會好節制，拍攝期間，大部份飲食都係冇油、鹽、澱粉。」維持大運動量又要控制飲食實在艱難，不過他說：「我係一個可以對自己好狠嘅人，但我又覺得，只有自己先可以鞭策自己做一啲辛苦嘅嘢。」

首次正式擔任動作指導：原來叫其他演員冒險係好難

《海關戰線》謝霆鋒第一次擔任動作指導，過往他亦有參與動作設計的部份，今次要為其他演員設計動作，又是另一項挑戰：「其實我覺得呢個崗位同我以往嘅工作唔係太大分別，最大分別係今次要設計同埋顧及埋對手、其他演員嘅部份。但係我結果都係將最危險嘅動作放咗係自己身上，原來叫另一個演員去冒險，係一件好唔舒服嘅事。」

《海關戰線》入面極多槍戰、打鬥、爆破場面，謝霆鋒更是渾身解數盡出「由頭打到尾」，不少高危動作他都堅持親身上陣：「由19歲參與動作電影《特警新人類》開始，跟Benny導演 (已故導演陳木勝) 拍戲，累積咗動作電影嘅經驗，直正而家develop咗一個團隊，可以呈現我想達到嘅畫面。幾年前我拍攝《怒火》時，呢啲職責係交畀Benny導演，而家就由我負責。」謝霆鋒在拍攝時經常堅持親身上陣，兼且每次成功過後，又會推進自己去到另一境界：「每次只會越來越高、爆破場面越來越大，所以未來要繼續拍，只會面對更大嘅挑戰。」

今次《海關戰線》以海關日常追捕走私罪案為題材，為此導演邱禮濤特別安排了潛水艇水底打鬥場面，謝霆鋒更是親身上陣拍攝：「拍攝時係 12 月，水溫特別低，加上要完成一連串打鬥動作，其實都唔容易。」相比貨櫃、爆破場面，水底拍攝危險程度相對較低，但對於謝霆鋒來說，嘗試水中激戰，算是另一種突破。

與張學友初次交手林嘉欣掀《戀愛行星》回憶殺

電影最後還有彩蛋，由張學友主唱的主題曲《很遠的地方》，原來是由謝霆鋒作曲：「呢首歌係拍完最後一幕之後寫嘅，旋律係代入張學友嘅角色而寫。佢喺戲中飾演一個躁狂抑鬱症患者，情緒大起大落，但又會為此自責，係一個比較可憐嘅角色。我將呢份感覺放喺隻歌入面，估唔到佢到最後並冇作任何改動，代入角色，將感情完全演繹出嚟，相信除咗佢都冇其他人可以做到。」