- entertainment
- by Say八婆
- 2024-10-23
洪嘉豪（Kaho）的澳門演唱會《KAHO LIVE 2024》於上星期六（19日）雖已圓滿落幕，但事隔數天討論熱度仍未減退。事源洪嘉豪帶病上場，聲音略顯沙啞，但所幸未嚴重地影響整場演出，不過因為過度fan service導致影響演唱會觀感，令不少網民都在社交平台上公開表示不滿，甚至有人指「成世人睇過最不堪入目嘅show」，力數3宗罪！
洪嘉豪演唱會感動落淚爆喊
一向淚腺發達的洪家豪，曾在紅館落淚的他，堅稱不會再喊。但由於演唱會舉行的日期與洪家豪的生日接近，在場觀眾為他唱起生日歌慶生時，令他在演唱最後一首歌《洗面》時感動落淚！他表示：「上次男人流淚，一直喺心耿耿於懷，覺得明明一個好好機會，話俾人知我做到，但個次又衰咗，導致『創傷後遺症』，上次紅館啲片我真係冇咩睇過，今晚克服到再唱一次係咪值得畀掌聲！」雖然現場氣氛好，但演唱會後依然受到批評，究竟網民力數邊3宗罪？
洪嘉豪演唱會第1宗罪：多首金曲變「自拍位」
不少歌迷期待入場可以聽洪家豪唱多首金曲，如《十號儲物櫃》、《污糟兒》但沒有想到演唱會有大約三分一的時間都被「自拍位」騎劫，網民表示不停自拍，影相、自拍再影相，由聽歌變睇人自拍！有坐前排網民表示：「我已經坐近延伸舞台嘅位置，但後面啲人開始衝曬過嚟遞手機要自拍，佢又真係應承。你知依啲影得一個就有第2個，然後就望住佢同人自拍咗兩首歌。本身以為咁就完，點知差唔多到尾段有一part係佢最出名嘅幾首歌，本應係演唱會最High嘅部份，佢又攞曬嚟同人自拍左6定7首歌。」
洪嘉豪演唱會第2宗罪：掛住與前排粉絲互動
洪嘉豪澳門站的舞台設計與紅館不同，在台左和右各設一條延伸天橋，令他可以在演唱時近距離與院友（粉絲名）握手、自拍或閒聊。而在後期抒情歌部分，每當洪嘉豪走近，粉絲們的歡呼和尖叫聲都蓋過歌聲，甚至令洪嘉豪過於專注於與前排粉絲自拍，而忽略了演唱，受到批評！有粉絲指明白洪家豪錫粉絲同想盡量滿足大家，建議下次在encore時段做會更好。同時指自拍環節太多 ，除了導致人流控制差外，亦令其他觀眾參與感和氣氛即時下降。
洪嘉豪演唱會第3宗罪：狀態與紅館相差甚遠
有看過洪嘉豪紅館場的歌迷直言「同紅館比差好多，開聲已經又沙又拆，中途上唔到，走音都有，最誇有段唱唱下食左成句」、「最想聽嗰幾首都斷下斷下咁唱」等。事實上，洪嘉豪有自爆最近因病食了一個月藥：「喺係最壞嘅時侯，我嘗試換轉角度諗都幾好，可以喺演唱會前免疫咗，所以好想大家生活中，不能話好偉大要擁抱任何唔好嘅事情，但換個角度可能你會有得著！」洪嘉豪又承認因唱歌冇天份，之後會更加努力重視每個演出！
洪嘉豪事後道歉
有入場觀眾指洪嘉豪曾說過：「想聽歌嘅可以返屋企聽都得。」被粉絲留言批評掛住自拍，skip至少4、5首歌後，洪嘉豪在社交平台寫道歉寫到：「澳門站我感覺自己有點不同了，但說不出是些什麼，可能是在台上比以前淡定了，可能是入局比以前快了，可能是對自己認識更多了。」 他承認自己過於興奮而未有認真唱歌，「部份大家很想聽到的歌，原定應該要是認真地唱，但我當時沒有好好按捺自己，事後也有不停反思，實在抱歉。」洪嘉豪最後又指：「每次演出我也投放120的專注和認真，而每一次也理應比上一次做得更好，所以我會好好吸取經驗。感謝每一位到場支持我的觀眾和院友，昨晚我盡全力了，希望你們享受和快樂，愛你們。」
