森美游日臨時被中介網站取消酒店險瞓街！眾藝人分享中伏經歷、旅遊達人項明生教自保3招免失預算

港人愛去旅行，更愛自己行程自己定，然而近年在網上預訂酒店的中伏個案大增，就連藝人森美都「中招」。森美日前在社交平台分享自已與老婆游日時卻臨時被中介網站取消酒店，令他與老婆要漏夜找住宿，更差點流落街頭！事件引起網民熱議，更有不少藝人都紛紛分享中伏經歷！

森美游日臨時被取消酒店險瞓街

森美日前與老婆到日本旅行，但前日（12日）到達大阪後，他就於日本街頭拍片求助。他在影片中透露早前透過中介網站預訂酒店房間，但在當中下午卻被通知一周前已付款訂好的酒店不能提供房間入住，即使他到達酒店櫃枱跟職員爭論2小時都無果。

森美拍下找酒店過程，又表示撞正日本三連假，不少酒店爆滿，就連時鐘酒店和網吧都無位。他與老婆每人拖住大行李篋在大阪展開搵酒店之旅，至晚上10時仍未找到落腳地，老婆更氣得不理睬他。「而家夜晚十點，我搵晒成個大阪都冇酒店……唯一搵到嘅酒店喺奈良，但係冇可能飛去奈良，最後發生咩事會點呢？搵咗成晚都搵唔到酒店，上網站….我都唔知自己噏乜，總之都搵唔到酒店。重點係我老婆都開始唔睬我，希望今晚搵到地方瞓啦！」他還寫下：「星期六晚嘅大阪真係冇酒店有房，大酒店都冇，小酒店又係冇，親身去咗問幾間，全部爆曬，今晚去邊？」

而一小時後，森美在社交網報喜，表示在朋友幫忙下找到酒店房，避過瞓街一劫。「感謝各方好友，個個都搵朋友又或者自己找上門幫手，結果真係有一個朋友雖然好耐冇見，但係就憑今次經歷，幫我喺網上面搵到一間不遠嘅酒店！最後一間房﹗下次book咗房真係要再自己send email去酒店confirm先至好出發，網上網站，中介人信唔過。我知你哋好想知係邊間……詳情留番節目講畀大家聽」。

雖然森美並未透露是哪個中介訂房網，但有網民熱心為森美找酒店房時，森美的回應都令網民推測，他正是透過「A字頭」的訂房網中伏。（圖片來源：@sammy903）

眾藝人分享中伏經歷

對於森美今次的悲慘遭遇，不少藝人都表示有共鳴，江若琳老公蕭唯展留言指：「Axxxa我都奶（瀨）過佢嘢」、而林奕匡亦分享：「我試過一次喺NY返港班機cancel而航空公司安排免費酒店，email已經 confirm好入住邊間酒店，最後去到嘅時候酒店話冇房，話唔關佢哋事，叫我聯絡返航空公司。諗住不如自己book算，但原來全部附近酒店都已經滿晒。 🥲」

而前港姐袁彌明也就事件在社交網站發文，但她就表示自己用了「A字頭」的訂房網10多年都沒有試過被臨時取消酒店房，又指「可能今次係森美唔好彩？定係真係我太好彩？」

旅遊達人項明生教自保3招免失預算

去旅行難免會中伏，想防止遇上同類事件，旅遊達人兼曾任職酒店業的項明生在今早（14日）的商台節目中就分析事件成因，他認為當地正值公眾假期，房間爆滿，而中介網站與酒店之間可能存在「時間差」而導致預訂失效。

項明生又傳授3招自保方法，可以大大減低中伏機率。第一是在中介網站預訂後，再寄一封電郵給酒店確認是否已有相關預訂；第二是建議直接在酒店官網預訂最安全；第三是在預訂酒店前先貨比三家，也要留意酒店官網的資訊，如果相關房類在酒店官網沒有空房，但在中介網站卻顯示有空房，就要特別留神，因為有機會出現未能入住的情況。即使最後能入住該酒店，都有可能會被安排位置較差的房間。