【大叔的愛】陳子豐獨家專訪：「想同Anson Lo親熱但導演拒絕咗我！」

《大叔的愛》今個星期進入「結局篇」，睇到大家相當肉緊。劇中飾演「暖男牧牧」凌少牧前男友「Darren」的陳子豐，不單有上司威嚴，亦有依戀前男友的深情，演出備受矚目。

現實生活當中的陳子豐，與劇中「Darren」一樣育有一子，到底子豐是否因此對角色手到拿來？而除了「育有一子」之外，《大叔的愛》戲裏戲外又對佢有乜嘢衝擊？she.com特別專訪咗陳子豐，等佢親自話畀大家知！

《大叔的愛》收到角色有冇掙扎？演繹「直變孿」嘅角色，有冇為你帶來衝擊？

很開心可以接到《大叔的愛》呢套喜劇同Darren呢個角色，我完全沒有猶疑和掙扎便一口答應了。

成套劇對我嚟講，最大嘅「衝擊」係同Anson Lo冇任何親熱戲！因為呢件事喺現實中唔會發生(會畀陳太殺死)，所以我好希望喺戲入面感受男男嘅親蜜互動。

不過雖然我有同監製、導演反映過「係咪可以加啲親熱戲？」但都畀佢哋拒絕咗，希望將來嘅演出有機會嘗試啦。

現實生活嘅「爸爸身份」，有冇幫到你消化呢個角色？

可能本身我都係爸爸，所以對於Darren為愛阿牧而選擇放棄家庭、放棄仔仔有更深切體會。我覺得Darren為愛情而犧牲辛苦建立嘅家庭， 當中一定經過一番苦苦掙扎先會踏出呢一步。

正正因為踏出去就不能回頭，所以Darren 對阿牧嘅愛先會咁執着。

現實生活當中，陳太對你嘅演出有乜嘢解讀？

作為一個爵屎，陳太完全唔關心我嘅演出；加上陳太鍾意咗德斌好多年，所以陳太嘅注意力全部放喺KK同田田身上。

Darren呢個角色對你未來嘅演出有乜影響？

Darren 呢個角色對我嚟講係一場考試，因為係我第一次演喜劇。Darren 個角色係一個又 cool 又惡嘅上司，要拿捏個角色唔同嘅特質同時又要表達到對阿牧嘅柔情都係一大挑戰。多謝監製導演畀好大信心同信任我放膽去試，所以先會有一啲我為個角色加嘅元素，好似 teamwork同為阿田瘋狂吹傷口嘅場面，希望會為觀眾帶來歡樂。

昔日文章 >> 陳子豐專欄

IG: @colintszfung / @babybossjared