【i believe you can fly！】空姐有「光環」、人工高？話你知空中服務員的樂與淚！

不論電影或電視，都不時把空中服務員塑造得高尚又優雅，每次出現都彷彿要拉著皮喼說一句「我又飛喇～」！但事實上空姐、空少的飛行生活，可能並沒有大家想得那麼「風光」， 除了身體變差兼受氣，更會遇上不少令人「反眼」的事情。這次找來幾位「行內人」和「過來人」，以第一身告訴大家空中服務員的樂與淚！

疑問1：空姐人工一定高？
Jennifer：「好多人誤以為空姐人工好高，但事實唔係。每間航空公司嘅標準都唔同，即使係同一間航空公司，入職嘅底薪都不停變緊，即使我入行時拎緊某個人工，依家入行嘅人都唔保證份糧係一樣，可能會更低！」

疑問2：內地客一定煩？
Nana：「其實唔關國籍事，好多時係啲客唔明我哋嘅職責。試過有個香港媽媽因為囝囝瞓咗覺，唔肯俾我哋幫小朋友扣安全帶，但基於安全理由小朋友一定要扣，最後媽媽都有大聲鬧同講出『我個BB係我嘅，佢有事我會自己負責』呢種說話 ！」Jennifer：「內地客好多時係因為唔識，同佢解釋佢哋會明。反而香港人咩都識，所以好多不同嘅要求！」

疑問3：空姐空少好高尚？
安德魯：「我第二班operation嘅機就遇到有人嘔，前後位都係，最後咪又係我哋執！另外亦有大學畢業生話自己唔會做洗廁所呢啲嘢，但其實洗廁所都係我哋職責！」Nana：「我覺得做空姐冇所謂嘅光環，因為對我嚟講我份工其實都好辛苦！」

除了分享作為空中服務員的樂與淚，下一集Nana、Jennifer和安德魯更會分享見工tips，以及投身空中服務員這個行業需要注意的地方，想入行的朋友記得留意！