【咪再懶啦…】呢4個壞習慣，會令臉上粉刺愈來愈多！

唔少人都會有個疑問：「明明我好勤力洗臉，點解都仲會有黑頭粉刺呢？」其實粉刺嘅成因有好多，生活習慣、日常飲食等，都可能會令你出現粉刺問題，而一啲容易被忽略嘅習慣，更加會令你粉刺愈生愈多，就算日日勤力洗臉都冇用，即刻睇吓你中咗幾多樣！

1. 唔洗粉撲
唔少女仔都有化妝習慣，但日日都用嘅粉撲好有可能成為「粉刺製造者」，因為重覆用嘅粉撲上面會有汗、臉油同皮脂，細菌就會因此而滋生，日日用相同粉撲印上臉只會令粉刺愈來愈多！所以預備多於一個粉撲替換之外，亦最好2至3日清洗一次，如果真係怕煩，最好都每個星期洗吓！。
2. 唔換枕頭套
同粉撲差唔多，枕頭每日都會用，瞓覺時亦一定會出汗、臉油同頭油等，每晚臉部肌膚都會同枕頭套有近距離接觸，好易將細菌帶到臉上！所以枕頭套最好要定時更換啊！

3. 成日捱夜
呢樣嘢講過好多次，捱夜真係會令皮膚變差！睡眠不足亦會令皮膚變得暗啞粗糙、毛孔粗大之餘，肌膚亦會因缺水而冒油，喺呢個情況之下，粉刺問題就會愈來愈嚴重啦！
4. 唔抹電話
之前已經有報導指出，手提電話上嘅細菌分分鐘可能多過廁所板，仲要成日將電話貼住塊臉，想唔生粉刺都難！所以真係要每日用消毒紙巾輕抹電話，盡可能抹走細菌同污垢啦！